ഫോഡ്​ മസ്​താങ്ങി​െൻറ പിതാവ്​ ലീ അയാകോക്ക അന്തരിച്ചു

ലോസ് ആഞ്ചല്‍സ്: അമേരിക്കൻ വാഹന നിർമാതാക്കളായ ഫോഡി​​​​െൻറ മുൻ പ്രസിഡൻറും ജനപ്രിയ സ്‌പോര്‍ട്‌സ് മോഡലായ മസ്താങ്ങിൻെറ പിതാവുമായ ലീ അയകോക്ക (94) അന്തരിച്ചു. ചൊവ്വാഴ്ച രാവിലെ ലോസ് ആഞ്ചല്‍സിലെ ബെൽ- എയറിലെ വീട്ടിലായിരുന്നു അന്ത്യമെന്ന് അയകോക്കയുടെ കുടുംബം സ്ഥിരീകരിച്ചു. പാർക്കിസൺസ്​ രോഗത്തെ തുടർന്ന്​ ഏറെനാളായി ചികിത്സയിലായിരുന്ന​ു.

ലീ അയാകോക്ക ഫോഡി​​​​െൻറ മുന്‍ പ്രസിഡൻറും ക്രൈസ്‌ലറിൻെറ ചീഫ് എക്‌സിക്യൂട്ടീവ് ഓഫീസറുമായിരുന്നു. ഫോഡ്​ മസ്​താങിനെ കൂടാതെ ക്രൈസ്‌ലര്‍ മിനിവാന്‍, കെ-കാര്‍ എന്നിവയുടെ പിതാവ് കൂടിയാണ് അയകോക്ക. 1964 ൽ പുറത്തിറക്കിയ ഫോർഡ്​ മസ്​താങ്​ ​ഏറ്റവും ജനപ്രിയ വാഹനമായിരുന്നു.

1980 കളുടെ തുടക്കത്തില്‍ വലിയ സാമ്പത്തിക പ്രതിസന്ധിയില്‍ അകപ്പെട്ട ക്രൈസ്​ലറിനെ ‘നിങ്ങളൊരു നല്ല കാർ കണ്ടെത്തുകയാണെങ്കിൽ അത്​ വാങ്ങൂ’ എന്ന പരസ്യത്തിലൂടെ കമ്പനിയെ ലാഭത്തിലേക്ക്​ നയിച്ചത്​ അയകോക്കയായിരുന്നു.

1924 ഒക്ടോബര്‍ 15 ന് പെനിസിവാനിയയിലെ അലന്‍ടൗണിലായിരുന്നു അയകോക്കയുടെ ജനനം. പ്രിൻസ്​ടൺ സർവകലാശാലയിൽ നിന്നും മെക്കാനിക്കല്‍ എന്‍ജിനിയറിങില്‍ ബിരുദാനന്തര ബിരുദമുള്ള അയകോക്ക 1946 ല്‍ ഫോഡിലായിരുന്നു കരിയർ ആരംഭിച്ചത്. 1970-ല്‍ ഫോര്‍ഡിൻെറ പ്രസിഡൻറായി നിയമിക്കപ്പെട്ടു. 1978 ല്‍ ക്രൈസ്‌ലറിനൊപ്പം ചേര്‍ന്ന ലീ തൊട്ടടുത്ത വര്‍ഷം കമ്പനി സി.ഇ.ഒ ആയി. ക്രൈസ്​ലറിനെ ലോകോത്തര വാഹന നിർമാതാക്കളെന്ന പദവിയിലേക്ക്​ ഉയർത്തിയ ശേഷം 1992 ലാണ്​ അദ്ദേഹം കമ്പനിയിൽ നിന്ന്​ വിരമിച്ചത്.