ചൈനയു​ടെ കോവിഡ് പരിശോധന​ കിറ്റ്​ പ്രവർത്തനരഹിതം; തിരിച്ചയച്ച്​ സ്​പെയിൻ

മാഡ്രിഡ്​: ചൈനയിൽനിന്നും വാങ്ങിയ കോവിഡ്​ 19 പരിശോധന​ കിറ്റുകൾ പ്രവർത്തിക്കുന്നില്ലെന്ന ആരോപണവുമായി സ്​പെയിൻ. കൊറോണ പോസിറ്റീവ്​ കേസുകൾ സ്ഥിരീകരിക്കുന്നതിൽ 30 ശതമാനത്തിൽ താഴെ മാത്രമാണ്​ അവയുടെ കൃത്യതയെന്ന്​ സ്​പെയിനിലെ മൈക്രോ ബയോളജിസ്റ്റുകൾ സാക്ഷ്യപ്പെടുത്തുന്നു.

പോസിറ്റീവ്​ കേസുകൾ യഥാവിധം കണ്ടെത്തുന്നില്ല. ഇത്രയും പണം നൽകിയതി​​െൻറ ഫലം കിറ്റുകൾ നൽകുന്നില്ലെന്നും അവ ഉപയോഗിച്ച ആരോഗ്യ വിഭാഗം അറിയിച്ചു. നിലവിലുള്ള പി.സി.ആർ ടെസ്​റ്റുകൾ തുടരാനാണ്​ രാജ്യത്തി​​െൻറ തീരുമാനം. ചൈനയുടെ കിറ്റുകൾ പരാജയപ്പെട്ട സ്ഥിതിക്ക്​ എല്ലാം തിരിച്ചയക്കും​.

നിലവിൽ 4000ത്തിലധികം കോവിഡ്​ മരണം സംഭവിച്ച സ്​പെയിൻ എത്രയും പെട്ടന്ന്​ വൈറസ്​ വ്യാപനം തടയാനും മരണനിരക്ക്​ കുറക്കാനുമുള്ള അതിതീവ്ര പരിശ്രമം നടത്തുന്നതിനിടെയാണ്​ ഇൗ അനുഭവം​.

അതേസമയം ലൈസൻസില്ലാത്ത കമ്പനിയിൽനിന്നാണ്​ ഇപ്പോൾ സ്​പെയിൻ കിറ്റുകൾ വാങ്ങിയതെന്ന്​ ചൈനീസ്​ എംബസി പറഞ്ഞു. നേരത്തെ ഇരുരാജ്യങ്ങളും ഒപ്പുവെച്ച 423 മില്യൺ യൂറോ കരാറിൽ ഉൾപ്പെട്ട കിറ്റുകളല്ല ഇപ്പോൾ സ്​പെയിനിന്​ ലഭിച്ചത്​. 5.5 ബില്യൺ കിറ്റുകളാണ്​ കരാർ പ്രകാരം ചൈന സ്​പെയിനിന്​ നൽകുക.

നേരത്തെ ചെക്​ റിപബ്ലിക്കും വമ്പൻ തുകക്ക് ചൈനയിൽ നിന്നും​ വാങ്ങിയ 80 ശതമാനം ടെസ്റ്റിങ്​ കിറ്റുകളും ഉപയോഗശൂന്യമാണെന്ന്​ പരാതിയുന്നയിച്ചിരുന്നു.