അവൻഗാർഡ് ഹൈപ്പർസോണിക്​ മിസൈൽ പരീക്ഷിച്ച്​ റഷ്യ

മോസ്​കോ: അത്യാധുനിക ഹൈ​പ്പർസോണിക്​ മിസൈൽ പരീക്ഷിച്ച്​ റഷ്യ. മണിക്കൂറിൽ 33,000 കിലോമീറ്റർ വരെ വേഗത്തിൽ ആണവായുധവുമായി തെന്നിപ്പറക്കാൻ ശേഷിയുള്ള ഗ്ലൈഡർ ‘അവൻഗാർഡ്’ ​ എന്ന പേരിലുള്ള മിസൈൽ പരീക്ഷിച്ച വിവരം പ്രതിരോധമന്ത്രാലയമാണ്​ അറിയിച്ചത്​. എവിടെയാണ്​ പരീക്ഷണം നടത്തിയതെന്ന്​ വ്യക്​തമാക്കിയിട്ടില്ല.

ഭൂഖണ്ഡാന്തര ബാലിസ്​റ്റിക് മിസൈലിൽ ഘടിപ്പിച്ചാണ് പുതിയ ആയുധം ലക്ഷ്യത്തിലേക്കു കുതിക്കുന്നത്. ഇതിന് 2000 ഡിഗ്രി വരെ ചൂടു താങ്ങാനും 20 ലക്ഷം ടൺ ടി.എൻ.ടിക്കു സമാനമായ സ്ഫോടകശേഷിയുള്ള ആയുധം വഹിക്കാനും കഴിയുമെന്ന്​ റഷ്യ അവകാശപ്പെട്ടു.

കഴിഞ്ഞ മാർച്ചിൽ ആദ്യമായി അവതരിപ്പിച്ച, ശബ്​ദത്തെക്കാൾ‌ 20 മടങ്ങിലധികം വേഗത്തിൽ സഞ്ചരിക്കാൻ കഴിയുന്ന ഗ്ലൈഡറിന് ലംബമായും തിരശ്ചീനമായും അതിവേഗം തെന്നിമാറാനുള്ള കഴിവുള്ളതിനാൽ ഇതി​​െൻറ സഞ്ചാരപഥം പ്രവചിക്കാൻ കഴിയില്ല. അതുകൊണ്ടുതന്നെ ലോകത്തു നിലവിലുള്ള മിസൈൽ പ്രതിരോധ സംവിധാനങ്ങൾക്കൊന്നും അവൻഗാർഡ് കണ്ടെത്താനോ പ്രതിരോധിക്കാനോ കഴിയില്ലെന്ന് റഷ്യ അവകാശപ്പെട്ടിരുന്നു.

പുതിയ പരീക്ഷണം റഷ്യയെ മറ്റു​ രാജ്യങ്ങളേക്കാൾ മുന്നിലെത്തിക്കുമെന്ന്​ റഷ്യൻ പ്രസിഡൻറ്​ പുടിൻ പറഞ്ഞു.അമേരിക്കയുൾ​െപ്പടെയുള്ള പാശ്ചാത്യ രാജ്യങ്ങൾക്ക്​ കടുത്ത വെല്ലുവിളി ഉയർത്താൻ പുതിയ മിസൈൽ പരീക്ഷണംകൊണ്ട്​ സാധിക്കുമെന്നാണ്​ റഷ്യയുടെ വിലയിരുത്തൽ. 2022ൽ ഹൈപ്പർസോണിക്​ മിസൈൽ പരീക്ഷണം നടത്താനാണ്​ അമേരിക്കയുടെ പദ്ധതി. ചൈനയും സമാനമായ മിസൈൽ നിർമിക്കുന്നുണ്ടെന്ന്​ റിപ്പോർട്ടുകളുണ്ട്​.

ലോകത്തിലെ ഏറ്റവും വേഗ‌മുള്ള ആണവ മിസൈലുകൾ

1. അവൻഗാർഡ് (റഷ്യ)
വേഗം: മണിക്കൂറിൽ 33,000 കി.മീ.
2. എം51 (ഫ്രാൻസ്)
വേഗം: മണിക്കൂറിൽ 30,870 കി.മീ.
ദൂരപരിധി: 11,000 കി.മീ. കൃത്യത: 200 മീറ്റർ
3. ഡി41 (ചൈന)
വേഗം: മണിക്കൂറിൽ 30,626 കി.മീ.
ദൂരപരിധി: 15,000 കി.മീ. കൃത്യത: 500 മീറ്റർ
4. അഗ്​നി-5 (ഇന്ത്യ)
വേഗം: 29,600 കി.മീ. വരെ
ദൂരപരിധി: 8000 കി.മീ. കൃത്യത: 10-80 മീറ്റർ
5. ട്രൈഡൻറ്​-ഡി5 (യു.എസ്)
വേഗം: 29,020 കി.മീ.
ദൂരപരിധി: 12,000 കി.മീ. കൃത്യത: 90 മീറ്റർ