ലോക സുന്ദരിപട്ടം മിസ്​ ജെമൈക്കക്ക്​; ഇന്ത്യയുടെ സുമൻ റാവുവിന്​ മൂന്നാം സ്ഥാനം

ന്യൂഡൽഹി: 2019ലെ ലോക സുന്ദരി പട്ടം മിസ്​ ജെമൈക്ക ടോണി ആന്‍ സിങ് സ്വന്തമാക്കി. ഫ്രാന്‍സുകാരിയായ ഒഫീലി മെസിനോ രണ്ടാം സ്ഥാനവും ഇന്ത്യക്കാരിയായ സുമന്‍ റാവുവിന് മൂന്നാം സ്ഥാനവും ലഭിച്ചു.

23കാരിയായ ടോണി സിങ് മനഃശാസ്ത്രത്തിലും വുമൻ സ്​റ്റഡീസിലുമാണ് ബിരുദം നേടിയത്. നാലാംതവണയാണ് ജെമൈക്കക്കാരി ലോക സുന്ദരി പട്ടം കരസ്ഥമാക്കുന്നത്. ഇതിന്​ മുമ്പ്​ 1963, 1976,1933 വർഷങ്ങളിലാണ്​ ജെമൈക്കൻ സുന്ദരികൾ പട്ടം സ്വന്തമാക്കിയിട്ടുള്ളത്​.

69ാം ലോക സുന്ദരി മത്സരത്തിൽ 120 രാജ്യങ്ങളിൽ നിന്നുള്ള വനിതകളാണ്​ പ​ങ്കെടുത്തത്​.
അവസാന റൗണ്ടില്‍ അഞ്ച് പേരാണ് ഇടം നേടിയത്. ചോദ്യോത്തരവേളയിൽ നിന്നാണ് അവസാന വിജയിയെ തെരഞ്ഞെടുത്തത്.

ജൂണില്‍ നടത്തിയ മിസ്​ ഇന്ത്യ മത്സരത്തില്‍ ഒന്നാം സ്ഥാനം കരസ്ഥമാക്കിയാണ് 20 കാരിയായ സുമന്‍ റാവു ലോക സുന്ദരി പട്ടത്തിന് ഇന്ത്യന്‍ പ്രതിനിധിയായി പങ്കെടുത്തത്.