ആമസോൺ കത്തുന്നു; അണക്കാൻ സൈന്യമെത്തി

സവോപോളോ: ‘ഭൂമിയുടെ ശ്വാസകോശ’മായ ആ​മസോൺ മഴക്കാടുകൾ അഗ്​നി വിഴുങ്ങുന്നതിനെതിരെ ശക്​തമായ പ്രതിഷേധം തണുപ ്പിക്കാൻ രക്ഷാദൗത്യവുമായി ബ്രസീൽ സേന. വനനശീകരണത്തിനു​ പിന്തുണ നൽകുന്നുവെന്ന ആരോപണം നേരിടുന്ന പ്രസിഡൻറ്​ ജയ ്​ർ ബൊൾസൊനാരോയാണ്​ അഗ്​നി പടർന്ന മേഖലകളിലും അതിർത്തി പ്രദേശങ്ങളിലും ​സൈന്യത്തെ വിന്യസിച്ചത്​.

അഗ്​നി കൂടുതൽ മേഖലകളിലേക്ക്​ പടർന്നിട്ടും നടപടി സ്വീകരിക്കാൻ ബ്രസീൽ വിസമ്മതിച്ചതോടെ ലോക രാഷ്​ട്രങ്ങൾ ഭീഷണിയുമായി രംഗത്തെത്തിയിരുന്നു. ലാറ്റിനമേരിക്കൻ രാജ്യവുമായി നേരത്തെ ധാരണയിലെത്തിയ വ്യാപാര കരാറിൽ ഒപ്പുവെക്കില്ലെന്ന്​ കഴിഞ്ഞ ദിവസം ഫ്രാൻസ്​ മുന്നറിയിപ്പു​ നൽകി. അയർലൻഡ്​, ഫിൻലൻഡ്​ തുടങ്ങിയ രാജ്യങ്ങളും നിലപാട്​ പരസ്യമാക്കി. അന്താരാഷ്​ട്ര ദുരന്തമാണെന്ന്​ ജർമൻ ചാൻസ്​​ലർ അംഗല മെർകൽ, യു.കെ പ്രധാനമന്ത്രി ബോറിസ്​ ജോൺസൺ എന്നിവർ പ്രഖ്യാപിച്ചു. കൂടുതൽ രാജ്യങ്ങൾ കണ്ണിചേരുമെന്നായതോടെയാണ്​ വെള്ളിയാ​ഴ്​ച ടെലിവിഷനിൽ രാജ്യത്തെ അഭിമുഖീകരിച്ച്​ സൈന്യത്തെ വിന്യസിക്കുന്നതായി ബൊൾസൊനാരോ പ്രഖ്യാപിച്ചത്​.

ആമസോൺ കാടുകളെ വിഴുങ്ങുന്ന അഗ്​നിബാധകളിലേറെയും മനുഷ്യനിർമിതമാണെന്നാണ്​ ആരോപണം. കാട്​ വെളുപ്പിച്ച്​ കൃഷിയിറക്കാനും ഖനനം നടത്തി കച്ചവടം കൊഴുപ്പിക്കാനുമുൾപ്പെടെ പദ്ധതികളാണ്​ പിന്നിൽ. ഇതിനെതിരെ രംഗത്തുള്ള പരിസ്​ഥിതി പ്രവർത്തകർക്കെതിരെ പ്രസിഡൻറ്​ പരസ്യമായി വിമർശനമുന്നയിച്ചിരുന്നു. മഴക്കാടുകൾ വെട്ടിത്തെളിക്കാൻ സർക്കാർ പച്ചക്കൊടി കാണിച്ചതാണ്​ ഇത്രയും വലിയ അഗ്​നിബാധക്കു കാരണമായത്​.

ലോകത്തെ ഏറ്റവും വലിയ മഴക്കാടുകളായ ആമസോൺ ആഗോള താപനത്തെ ചെറുക്കുന്ന ലോകത്തെ ഏറ്റവും വലിയ കാർബൺ ശേഖരമായാണ്​ കണക്കാക്കുന്നത്​. 30 ലക്ഷം ​െചടികളും ജീവികളും വസിക്കുന്ന ഇവിടെ 10 ലക്ഷത്തോളം ആദിവാസികളുമുണ്ട്​.