പ്രധാനമന്ത്രിക്ക് പിന്നാലെ ബ്രിട്ടീഷ് ആരോഗ്യമന്ത്രിക്കും കോവിഡ്

ലണ്ടൻ: പ്രധാനമന്ത്രി ബോറിസ് ജോൺസണ് പിന്നാലെ ബ്രിട്ടീഷ് ആരോഗ്യമന്ത്രി മാറ്റ് ഹൻകോക്കിനും കോവിഡ് സ്ഥിരീകരിച്ചു. ട്വിറ്ററിലൂടെ ഇദ്ദേഹം തന്നെയാണ് വിവരം പുറത്തുവിട്ടത്.

തനിക്ക് കോവിഡ് ലക്ഷണങ്ങൾ ഉണ്ടായിരുന്നെന്നും അതിനാൽ കഴിഞ്ഞ ഏതാനും ദിവസങ്ങളായി വീട്ടിൽ സമ്പർക്കവിലക്കിൽ കഴിഞ്ഞുകൊണ്ടാണ് കാര്യങ്ങൾ ഏകോപിപ്പിച്ചതെന്നും മാറ്റ് ഹൻകോക്ക് പറഞ്ഞു.

ബ്രിട്ടണിൽ കോവിഡ് പ്രതിരോധ പ്രവർത്തനങ്ങൾക്ക് ബോറിസ് ജോൺസണൊപ്പം നേതൃത്വം നൽകിയിരുന്നത് ഇദ്ദേഹമായിരുന്നു.

കോവിഡ് പ്രതിരോധ പ്രവർത്തനങ്ങൾക്ക് രാജ്യം മുഴുവൻ പിന്തുണ നൽകുന്നതിൽ സന്തോഷമുണ്ട്. പ്രവർത്തനങ്ങൾക്ക് എല്ലാ പിന്തുണയും നൽകുന്നത് തുടരും -മാറ്റ് ഹൻകോക്ക് വിഡിയോ സന്ദേശത്തിൽ പറഞ്ഞു.

14,543 പേർക്കാണ് ബ്രിട്ടണിൽ കോവിഡ് സ്ഥിരീകരിച്ചത്. 753 പേർ മരിക്കുകയും ചെയ്തു.