ബാല ലൈംഗികത: ഹസൻ സുറൂർ അറസ്റ്റിൽ

ലണ്ടൻ: പ്രായപൂർത്തിയാവാത്ത പെൺകുട്ടിയെ ലൈംഗിക ബന്ധത്തിന് ക്ഷണിച്ചു എന്ന ആരോപണത്തിൻെറ പേരിൽ ഇന്ത്യക്കാരനായ ബ്രിട്ടിഷ് പത്രപ്രവർത്തകനെ പൊലിസ് അറസ്റ്റ് ചെയ്തു. ഇന്ത്യയിലെ പ്രമുഖ ദേശീയ പത്രങ്ങളിലെ കോളമിസ്റ്റായ ഹസൻ സുറൂറിനെയാണ് (64) ബ്രിട്ടീഷ് ട്രാൻസ്പോർട്ട് പൊലിസ് അറസ്റ്റ് ചെയ്തത്. ഇയാളെ വെസ്റ്റ്മിനിസ്റ്റർ മജിസ്ട്രേറ്റ് കോടതിയിൽ ഹാജരാക്കും.

ഫേസ്ബുക്കിൽ 14 വയസ്സുകാരിയുടെ വ്യാജ പ്രൊഫൈലുണ്ടാക്കി സുറൂറുമായി ബന്ധപ്പെടുകയും ലൈംഗിക സംഭാഷണം നടത്തുകയും ചെയ്തു എന്നാണ് ആരോപണം. ബാല ലൈംഗിക വിരുദ്ധ ഗ്രൂപ്പാണ് പ്രൊഫൈലുണ്ടാക്കിയത്. ഫേസ്ബുക്കിലെ സംഭാഷണത്തിൻെറ തുടർച്ചയായി പെൺകുട്ടിയെ കാണാനാണ് ഹസൻ സുറൂർ ചെൽസിയിൽ നിന്നും ഡെപ്റ്റ്ഫോർഡ് ബ്രിഡ്ജിലെത്തിയത്. തുടർന്ന് ഒളിക്യാമറാ സംഘം ഇയാളെ വളയുകയായിരുന്നു. സംഘം നൽകിയ വിവരമനുസരിച്ച് പൊലീസ് എത്തി അറസ്റ്റ് രേഖപ്പെടുത്തി.

ഹിന്ദു, ഗാർഡിയൻ, ദ ഇന്ത്യൻ എക്സ്പ്രസ് എന്നീ പത്രങ്ങളിലെ കോളമിസ്റ്റാണ് ഹസൻ സുറൂർ.