തുർക്കിയയിൽ ഭൂകമ്പം; 50 പേർക്ക്​ പരിക്ക്​

അങ്കാറ: വടക്കുപടിഞ്ഞാറൻ തുർക്കിയയിലെ ഗോൽകയ നഗരത്തിൽ ഭൂകമ്പമുണ്ടായി 50 പേർക്ക്​ പരിക്കേറ്റു. ഭൂകമ്പമാപിനിയിൽ 5.9 രേഖപ്പെടുത്തിയ ഭൂചലനമുണ്ടായത്​ ബുധനാഴ്ച പുലർച്ചെ നാലിനാണ്​.

അങ്കാറയിലും ഇസ്തംബുളിലും ഉൾപ്പെടെ അനുരണനമുണ്ടായി. ആളുകൾ ഭീതിദരായി താമസസ്ഥലത്തുനിന്ന്​ പുറത്തിറങ്ങി. ജനലിൽ, ബാൽക്കണിവഴി ചാടിയവരാണ്​ പരിക്കേറ്റവരിലധികവും. ചില കെട്ടിടങ്ങൾക്ക്​ നാശനഷ്ടമുണ്ടായിട്ടുണ്ട്​. 1999 ആഗസ്റ്റിൽ വടക്കുപടിഞ്ഞാറൻ തുർക്കിയയിൽ 17000 പേർ കൊല്ലപ്പെട്ട വൻ ഭൂകമ്പമുണ്ടായിരുന്നു.

മേഖലയിലെ 80 ശതമാനം​ കെട്ടിടങ്ങളിൽ അതിന്​ ശേഷം പുനർ നിർമിച്ചവയാണ്​. അതേവർഷം നവംബറിൽ​ 800ഓളം പേർ കൊല്ലപ്പെട്ട ഭൂകമ്പമുണ്ടായ ഭാഗങ്ങളിൽതന്നെയാണ്​ ബുധനാഴ്ച ഭൂചലനമുണ്ടായത്​. ഭൂകമ്പത്തെ പ്രതിരോധിക്കാൻ കഴിയുന്ന രീതിയിൽ കെട്ടിടങ്ങൾ നിർമിച്ചതിനാലാണ്​ ഇപ്പോൾ വൻ ദുരന്തമുണ്ടാകാതിരുന്നതെന്ന് വിലയിരുത്തലുണ്ട്​.