ബംഗ്ലാദേശിൽ ദുർഗപൂജ ആഘോഷങ്ങൾക്കിടെ അക്രമം: നാലു മരണം

ധാക്ക: ബംഗ്ലാദേശിൽ ദുർഗപൂജ ആഘോഷങ്ങൾക്കിടെ നാലു ക്ഷേത്രങ്ങൾ തകർത്തതിനെ തുടർന്നുണ്ടായ സംഘർഷത്തിൽ നാലു പേർ കൊല്ലപ്പെട്ടു. രാജ്യത്ത്​ ഹിന്ദുക്ഷേത്രങ്ങൾക്കും ദുർഗപൂജ ആഘോഷങ്ങൾക്കുമെതിരെ ആക്രമണം നടത്തുന്നവർക്കെതിരെ ശക്തമായ നടപടി സ്വീകരിക്കുമെന്ന്​ ബംഗ്ലാദേശ്​ പ്രധാനമന്ത്രി ശൈഖ്​ ഹസീന അറിയിച്ചു.

തുടർന്ന്​ പ്രധാനമന്ത്രിയുടെ നിർദേശപ്രകാരം 22 ജില്ലകളിൽ അർധസൈനിക വിഭാഗങ്ങളെ വിന്യസിച്ചു. സംഭവം വിശദമായി അന്വേഷിക്കുമെന്നും പ്രതികളെ വെറുതെ വിടില്ലെന്നും ശൈഖ്​ ഹസീന ഉറപ്പുനൽകി. ഏതു മതത്തിൽ വിശ്വസിക്കുന്നു എന്നത്​ ഇവിടെ പ്രസക്തമല്ല. കുറ്റവാളികളെ കണ്ടെത്തി ശിക്ഷിക്കും. ഇവരെ സംബന്ധിച്ച്​ നിരവധി വിവരങ്ങൾ ലഭിച്ചിട്ടുണ്ട്​. കുറ്റവാളികളെ കണ്ടെത്താൻ സാ​ങ്കേതികവിദ്യ ഉപയോഗിക്കുമെന്നും അവർ വ്യക്തമാക്കി. വിശ്വാസികൾക്ക്​ ദുർഗപൂജ ആശംസകളും ശൈഖ്​ ഹസീന അറിയിച്ചു.

അക്രമസംഭവങ്ങളിൽ കുറ്റക്കാർക്കെതിരെ കർശന നടപടി സ്വീകരിക്കണമെന്ന്​ ഇന്ത്യ ബംഗ്ലാദേശിനോട്​ ആവശ്യപ്പെട്ടിരുന്നു. ദുർഗപൂജക്കായി നടത്തിയ ക്രമീകരണങ്ങൾ ജനക്കൂട്ടം നശിപ്പിക്കുന്നതും ക്ഷേത്രങ്ങൾ തകർക്കുന്നതുമായ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചിരുന്നു. മുസ്​ലിം ഭൂരിപക്ഷ രാഷ്​ട്രമായ ബംഗ്ലാദേശിൽ ന്യൂനപക്ഷങ്ങൾക്കെതിരായ ആ​ക്രമണങ്ങളിൽ നടപടി സ്വീകരിക്കുന്നില്ലെന്ന്​ ആക്ഷേപം ഉയർന്നിരുന്നു.