ചൈനയിൽനിന്ന്​ കടത്തിയ 154 പൂച്ചകൾക്ക്​ ദയാവധം; കടുത്ത വിമർശനം

തായ്​പെയ്​: ചൈനയിൽനിന്ന്​ മത്സ്യബന്ധന ബോട്ടിൽ എത്തിയ 154 പൂച്ചകൾക്ക്​ സർക്കാർ വിധിച്ചത്​ ദയാവധം. തായ്​വാൻ സർക്കാറാണ്​ ജൈവ സുരക്ഷ പറഞ്ഞ്​ എല്ലാ പൂച്ചകളെയും കൊന്നത്​. തായ്​വാൻ ദക്ഷിണ തീരപ്രദേശമായ കവോസിയൂങ്ങിലാണ്​ സംഭവം. സംശയം തോന്നി ബോട്ട്​ പരിശോധിച്ച ഉദ്യാഗസ്​ഥർ റഷ്യൻ ബ്ലൂ, റാഗ്​ഡോൾ, പേർഷ്യൻ അമേരിക്കൻ ഷോർട്​ഹെയർ തുടങ്ങിയ വിലകൂടിയ വിഭാഗങ്ങളിൽപെട്ട പൂച്ചകളെ 62 കൂടുകളിലടച്ച നിലയിൽ കണ്ടെത്തുകയായിരുന്നു. ഇവക്ക്​ രണ്ടര കോടി രൂപയിലേറെ വിപണിയിൽ വില വരുമെന്നാണ്​ കണക്കുകൂട്ടൽ.

കഴിഞ്ഞ ശനിയാഴ്ച എല്ലാ പൂച്ചകളെയും തായ്​വാൻ വധിച്ചു. വീടില്ലാ ജന്തുക്കളുടെ അന്താരാഷ്​ട്ര ദിനത്തിൽ നടത്തിയ കൂട്ട ഹത്യക്കെതിരെ പ്രതിഷേധം ശക്​തമാണ്​.

പൂച്ചകൾ എവിടെനിന്നെത്തിയെന്ന്​ അറിയാത്തതിനാൽ ജൈവ സുരക്ഷ മുൻനിർത്തി നടപടി സ്വീകരിക്കുകയായിരുന്നുവെന്നാണ്​ വിശദീകരണം. എന്നാൽ, അധികൃതർ നടത്തിയത്​ കൊടുംക്രൂരതയാണെന്ന വിമർശനവുമായി​ ജന്തുസ്​നേഹികൾ രംഗത്തെത്തി​.

വളർത്തുപൂച്ചകൾക്ക്​ വലിയ വിപണിയുള്ള രാജ്യമാണ്​ തായ്​വാൻ.