ഇസ്രായേൽ ആക്രമണത്തിൽ ബൈറൂതിൽ കൊല്ലപ്പെട്ടവരുടെ എണ്ണം 37 ആയി

ബൈറൂത്: ല​​ബ​​നാ​​ന്റെ ത​ല​സ്ഥാ​ന​മാ​യ ബൈ​റൂ​തി​​ന് തൊ​ട്ട​ടു​ത്ത ജ​​ന​​വാ​​സ കേ​​ന്ദ്ര​​മാ​യ ദാ​​ഹി​​യ​​യി​​ൽ ഇ​​സ്രാ​​യേ​​ൽ ന​ട​ത്തി​യ വ്യോ​മാ​ക്ര​മ​ണ​ത്തി​ൽ കൊല്ലപ്പെട്ടവരുടെ എണ്ണം 37 ആയി. മൂന്ന് കുഞ്ഞുങ്ങളും ഏഴ് സ്ത്രീകളും കൊല്ലപ്പെട്ടവരിലുൾപ്പെടുമെന്ന് ലബനൻ ആരോഗ്യമന്ത്രാലയം അറിയിച്ചു.

വെള്ളിയാഴ്ചയായിരുന്നു ദാ​​ഹി​​യ​​യി​​ൽ രണ്ട് കെട്ടിടങ്ങൾ ഇസ്രായേൽ വ്യോമാക്രമണത്തിൽ തകർത്തത്. 60ലേറെ പേർക്ക് പരിക്കേറ്റിട്ടുണ്ട്. കെട്ടിടങ്ങൾക്കിടയിൽ കാണാതായ 17 പേർക്കായി രക്ഷാപ്രവർത്തനം തുടരുകയാണ്.

താമസകേന്ദ്രത്തിന് നേരെ ഇസ്രായേൽ നടത്തിയ ആക്രമണം യുദ്ധക്കുറ്റമാണെന്ന് മന്ത്രി അലി ഹമീയ പറഞ്ഞു. മേഖലയെ ഒന്നാകെ ഇസ്രായേൽ യുദ്ധമുഖത്തേക്ക് വലിച്ചിഴക്കുകയാണെന്നും അദ്ദേഹം പറഞ്ഞു.

റ​ദ്‍വാ​ൻ സേ​ന യൂ​നി​റ്റി​ന്റെ യോ​ഗ​ത്തി​നി​ടെ​യാ​ണ് ആ​ക്ര​മ​ണം ന​ട​ന്ന​തെ​ന്നും നി​ര​വ​ധി ഹി​സ്ബു​ല്ല ക​മാ​ൻ​ഡ​ർ​മാ​ർ കൊ​ല്ല​പ്പെ​ട്ട​താ​യും ഇ​സ്രാ​യേ​ൽ സൈ​നി​ക വ​ക്താ​വ് അ​വി​ഷാ​യ് ആ​​ൻ​ഡ്രി പ​റ​ഞ്ഞു.

അതേസമയം, തങ്ങളുടെ രണ്ട് ഉന്നത കമാൻഡർമാർ കൊല്ലപ്പെട്ട കാര്യം ഹിസ്ബുല്ല സ്ഥിരീകരിച്ചു. ഇബ്രാഹിം ആഖീൽ, അഹമ്മദ് മഹമൂദ് വഹാബി എന്നിവരാണ് കൊല്ലപ്പെട്ടത്. ഹിസ്ബുല്ലയുടെ റദ്‍വാൻ സേനയുടെ മുതിർന്ന കമാൻഡറാണ് വഹാബി. ഹി​സ്ബു​ല്ല​യു​ടെ ഏ​റ്റ​വും ഉ​യ​ർ​ന്ന സൈ​നി​ക വി​ഭാ​ഗ​മാ​യ ജി​ഹാ​ദ് കൗ​ൺ​സി​ൽ അം​ഗ​മാ​ണ് ഇ​ബ്രാ​ഹീം ആ​ഖി​ൽ.