ചാവുകടൽ ചുരുളുകൾ വീണ്ടും; രണ്ടാം നൂറ്റാണ്ടിലെ ബൈബിൾ വിവർത്തനമെന്ന്​ ഇസ്രായേൽ

ടെൽ അവീവ്​: രണ്ടാം നൂറ്റാണ്ടിലേതെന്ന്​ കരുതുന്ന ചാവുകടൽ ചുരുളുകൾ പുതുതായി കണ്ടെത്തിയെന്ന്​ ഇസ്രായേൽ പുരാവസ്​തു അതോറിറ്റി. കഴിഞ്ഞ ദിവസമാണ്​ ജൂഡിയൻ മരുഭൂമിയിലെ ഗുഹയിൽ നിന്ന്​ ഇവ വീണ്ടെടുത്തതെന്ന്​ ഗവേഷകർ പറയുന്നു.

ഏറ്റവും പഴക്കമുള്ള ഹീബ്രു ലിഖിത രേഖകളായാണ്​ ചാവുകടൽ ചുരുളുകൾ. 2000 വർഷം ഇവക്ക്​ പഴക്കമുണ്ടെന്നാണ്​ കരുതുന്നത്​. നീണ്ട ആറു പതിറ്റാണ്ടിനു ശേഷം ആദ്യമായാണ്​ ഇവ വീണ്ടും കണ്ടെത്തുന്നത്​. 12ഓളം രേഖകൾ പുതുതായി വീണ്ടെടുത്തതായി ഇസ്രായേൽ പുരാവസ്​തു അതോറിറ്റി പറഞ്ഞു. ഹീബ്രു ബൈബിളിന്​ നഹൂം, സക്കറിയ എന്നിവരുടെ ഗ്രീക്ക്​ വിവർത്തനങ്ങളാണ്​ ഇവ. ദൈവനാമം മാത്രം ഹീബ്രുവിലും അവശേഷിച്ചവ ഗ്രീക്കിലുമാണുള്ളത്​. ​ജൂഡിയൻ മരുഭൂമി കേന്ദ്രീകരിച്ച്​ 2017 മുതൽ ഉത്​ഖനനം നടക്കുന്നുണ്ട്​. 70 വർഷം മുമ്പ്​ ഇവിടെനിന്ന്​ ചുരുളുകൾ ലഭിച്ചിരുന്നു. അവശേഷിച്ചവ കൂടി തേടിയാണ്​ അന്വേഷണം.

നാഹൽ ഹെവറിലെ കേവ്​ ഓഫ്​ ഹൊററിലാണ്​ ഇവയുണ്ടായിരുന്നതെന്ന്​ ഗവേഷകർ പറയുന്നു. വലിയ മലയിടുക്കുകളുള്ള ​പ്രദേശമായതിനാൽ അതിസാഹസികമായാണ്​ ഗവേഷകർ അകത്തെത്തിയിരുന്നത്​. ഇവിടങ്ങളിൽ 2,000 വർഷം മുമ്പ്​ മനുഷ്യർ വസിച്ചിരുന്നതായാണ്​ കണക്കുകൂട്ടൽ. ഒരു പഴയ കുട്ടയും മമ്മിയാക്കിയ ഒരു കുഞ്ഞും അധികമായി കണ്ടെത്തിയിട്ടുണ്ട്​. 1960കളിൽ നടത്തിയ ഗവേഷണങ്ങളിൽ സ്​ത്രീകൾ, പുരുഷൻമാർ, കുട്ടികൾ എന്നിവരുടെതായി 40 അസ്​തികൂടങ്ങളും ലഭിച്ചിരുന്നു. റോമൻ കടന്നുകയറ്റ കാലത്ത്​ ജറൂസലമിന്​ തെക്കുഭാഗത്തുള്ള ഇവിടെ ജൂത റിബലുകൾ ഒളിവിൽ കഴിഞ്ഞതായാണ്​ കണക്കുകൂട്ടൽ.