പാകിസ്​താനിലെ അഫ്​ഗാൻ സ്​ഥാനപതിയുടെ മകളെ തട്ടിക്കൊട്ടൂ​പോയി; ക്രൂര മർദനത്തിനു ശേഷം വിട്ടയച്ചു

കാബൂൾ: പാകിസ്​താനിലെ അഫ്​ഗാൻ അംബാസഡർ നജീബുല്ല അലീഖേലിന്‍റെ മകളെ അജ്​ഞാത സംഘം തട്ടിക്കൊണ്ടുപോയി ക്രൂരമർദനത്തിനിരയാക്കി. ഇസ്​ലാമാബാദിലെ ബ്ലൂ ഏരിയയിലാണ്​ സംഭവം. ഇളയ സഹോദരന്​ സമ്മാനം വാങ്ങി വാടകവാഹനത്തിൽ വീട്ടി​ലേക്ക്​ മടങ്ങുകയായിരുന്നു 27 കാരിയായ സിൽസില അലിഖേൽ. പെ​ട്ടെന്ന്​ വാഹനത്തിൽ ഒരാൾ ഇരച്ചുകയറിയതിൽ പ്രതിഷേധിച്ചതിനെ തുടർന്ന്​ മർദനം അഴിച്ചുവിടുകയായിരുന്നു. അബോധാവസ്​ഥയിലായ സിൽസിലയെ പിന്നീട്​ വിട്ടയച്ചു. ഇവർ ആശുപത്രിയിൽ ചികിത്സയിലാണ്​.

സംഭവത്തെ തുടർന്ന്​ അംബാസഡർക്കും കുടുംബത്തിനും സുരക്ഷ ​ശക്​തമാക്കിയതായി പൊലീസ്​ അറിയിച്ചു. 48 മണിക്കൂറിനകം പ്രതികളെ പിടികൂടാൻ പാക്​ പ്രധാനമന്ത്രി ഇംറാൻ ഖാൻ​ നിർദേശം നൽകിയിട്ടുണ്ട്​.

പാകിസ്​താനും അഫ്​ഗാനിസ്​താനുമിടയിൽ ഏറെയായി തുടരുന്ന ആരോപണ- പ്രത്യാരോപണങ്ങൾ ശക്​തമാകുന്നതിനിടെ നടക്കുന്ന ആക്രമണം അയൽരാജ്യങ്ങൾക്കുമിടയിൽ ബന്ധം വഷളാക്കുമെന്ന ആശങ്കയുണ്ട്​. താലിബാന്​ പാകിസ്​താൻ സഹായം നൽകുന്നതായി അഫ്​ഗാൻ സർക്കാർ ആരോപിക്കു​േമ്പാൾ പാക്​ മണ്ണിൽ ആക്രമണത്തിന്​ തീവ്രവാദികൾക്ക്​ മണ്ണൊരുക്കുന്നതായി ഇസ്​ലാമാബാദ്​ സർക്കാറും ആരോപിക്കുന്നു. ആരോപണം ഇരു വിഭാഗവും നിഷേധിക്കുന്നു.