കൊറോണ: പൊതുഇടങ്ങളിൽ സേഫ്​ പാസ്​ നടപ്പാക്കുന്നതിനെതിരെ പ്രതിഷേധം

നിക്കോസിയ: സേഫ്​ പാസ്​ നടപ്പാക്കുന്നതിൽ പ്രതിഷേധിച്ച് ആയിരക്കണക്കിന് ആളുകൾ സൈപ്രസ് തലസ്ഥാനമായ നിക്കോസിയയിലെ പ്രസിഡൻഷ്യൽ കൊട്ടാരത്തിന് പുറത്ത് തടിച്ചുകൂടി. പ്രസിഡന്റ് കൊട്ടാരത്തിന് പുറത്തെ മനുഷ്യാവകാശ സ്‌ക്വയറിലാണ്​ പ്രതിഷേധക്കാർ തമ്പടിച്ചത്​.

പൊതു സ്ഥലങ്ങൾ സന്ദർശിക്കാൻ ആഗ്രഹിക്കുന്ന വ്യക്തികൾക്ക് വൈറസ് പ്രതിരോധശേഷി തെളിയിക്കുന്നതിനുള്ള രേഖയാണ്​ സേഫ് പാസ്​. ഇത്​, മെയ് മാസത്തിൽ സൈപ്രസിൽ പ്രഖ്യാപിച്ചിരുന്നു. പക്ഷേ തുടക്കത്തിൽ ഇത് ചില ഇൻഡോർ വേദികളിൽ മാത്രമേ ആവശ്യമുണ്ടായിരുന്നുള്ളൂ. ജൂലൈ 20 മുതൽ ഗതാഗതം, കടകൾ, കഫേകൾ എന്നിവയുൾപ്പെടെ മിക്കവാറും എല്ലാ പൊതു സ്ഥലങ്ങളിലും സേഫ് പാസ് നിർബന്ധമാകുകയാണ്​. ഈ സാഹചര്യത്തിലാണ്​ പ്രതിഷേധം കനക്കുന്നത്​.

വാക്​സിൻ ചെയ്യാത്തവരെ ആഴ്ചയിൽ രണ്ടുതവണ പരിശോധന നടത്തുന്നത്​ അവസാനിപ്പിക്കണമെന്നും കൊറോണ വൈറസിനെതിരെ പ്രതിരോധ കുത്തിവയ്പ്പ് നിർബന്ധമല്ലെന്ന് പ്രസിഡന്‍റ്​ പ്രഖ്യാപിക്കണമെന്നും ആവശ്യപ്പെട്ടാണ്​ പ്രതിഷേധം. പ്രതിരോധ കുത്തിവയ്പ്പുകൾക്ക് പകരം, പ്രതിരോധ ചികിത്സ നൽകണമെന്നാണ്​ പ്രതിഷേധക്കാരുടെ ആവശ്യം. സാമൂഹിക മാധ്യമം വഴി പ്രചരിപ്പിച്ചാണ്​ പ്രതിഷേധക്കാർ തമ്പടിച്ചത്​.