You are here

കോവിഡ്​ കാലത്തെ ‘അന്താരാഷ്​ട്ര’ നുണകളും യാഥാർഥ്യവും 

12:50 PM
25/03/2020

കോവിഡ്​ വ്യാപനത്തിനൊപ്പം സമൂഹമാധ്യമങ്ങളിൽ വ്യാജ വാർത്തകളും പടർന്നു കയറുകയാണ്​. കരയുന്ന ഇറ്റാലിയൻ പ്രധാനമന്ത്രിയുടെ ചിത്രം, ക്രിസ്​റ്റ്യാനോ റൊണാൾഡോയുടെ കോവിഡ്​ ആശുപത്രി, സിംഹത്തെ അയച്ച പുടിൻ എന്നിങ്ങനെ നീളുന്ന വലിയ നുണകൾ സമൂഹമാധ്യമങ്ങളിൽ പ്രചരിക്കുന്നുണ്ട്​. സമൂഹമാധ്യമങ്ങളെ വിശ്വസിച്ച്​ പ്രമുഖമാധ്യമങ്ങളെല്ലാം വ്യാജ വാർത്തകൾ റിപ്പോർട്ട്​ ചെയ്​തതും നുണകൾക്ക്​ ‘ആധികാരികത’ നൽകി. കോവിഡ്​ കാലത്ത്​ സമൂഹമാധ്യമങ്ങളിൽ പ്രചരിച്ച അഞ്ചു ‘അന്താരാഷ്​ട്ര’ നുണകളും വാസ്​തവവും പരിശോധിക്കാം.

കരയുന്ന ഇറ്റാലിയൻ പ്രസിഡൻറ്​

കോവിഡ്​ വൈറസ്​ ഏറ്റവും സംഹാരതാണ്ഡവമാടിയ രാജ്യമാണ്​ ഇറ്റലി. മരണസംഖ്യയും വൈറസ്​ പിടിപെടുന്നവരും അനുദിനം ഇറ്റലിയിൽ പുതിയ ഉയരങ്ങളിലേക്ക്​ പടർന്നുകയറുകയാണ്​​. ഇതിനുപിന്നാലെ ഇറ്റാലിയൻ പ്രധാനമന്ത്രി ഗിയുസപ്പെ കോ​​​െൻറ മാധ്യമപ്രവർത്തകർക്കുമുമ്പിൽ കരയുന്ന ചിത്രം കരളലിയിപ്പിക്കുന്ന അടിക്കുറിപ്പുകളോടെ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു. എന്നാൽ പ്രസ്​തുത ചിത്രത്തിലുണ്ടായിരുന്നത്​ ബ്രസീലിയൻ പ്രസിഡൻറ്​ ജെയ്ർ ബോൽസൊനാരോ ആയിരുന്നു എന്നതാണ്​ വാസ്​തവം. 2019ൽ ഒരു ചടങ്ങിനിടെ വികാരാധീതനാകുന്ന ജെയ്ർ ബോൽസൊനാരോയുടെ ചിത്രമായിരുന്നു അത്​.

‘നന്മമരം’​ റൊണാൾഡോ

പോർചുഗീസ്​ സൂപ്പർ താരം ക്രിസ്​റ്റ്യാനോ റൊണാൾഡോ കളിക്കളത്തിന്​ പുറത്ത്​ ചാരിറ്റി പ്രവർത്തനങ്ങളിലൂടെ വലിയ മാതൃകകൾ സൃഷ്​ടിച്ച വ്യക്തിത്വമാണ്​. പക്ഷേ, കോവിഡ്​ കാലത്ത്​ റൊണോൾഡോയുടെ പേരിൽ അദ്ദേഹം പോലും അറിയാതെ വലിയ ഒരു നന്മ ചാർത്തപ്പെട്ടു. കോവിഡ്​ ബാധിതർക്കായി ത​​​െൻറ ഉടമസ്ഥതയിലുള്ള വൻകിട ഹോട്ടലുകൾ ആശുപത്രികളാക്കാൻ വിട്ടു നൽകി എന്ന വാർത്ത വലിയ ആഘോഷത്തോടെ സമൂഹമാധ്യമങ്ങളിൽ നിറഞ്ഞു. സ്​പെയിനിലെ മാർക്ക, ഡെയ്​ലി മെയ്​ൽ, ഗൾഫ്​ ന്യൂസ്​ അടക്കമുള്ള അന്താരാഷ്​ട്ര മാധ്യമങ്ങളും കേരളത്തിലെ ​മാധ്യമങ്ങളുമെല്ലാം പ്രസ്​തുത വാർത്ത വലിയ പ്രാധാന്യത്തോടെ നൽകി. ഒടുവിൽ ഗത്യന്തരമില്ലാതെ തങ്ങൾ ഇങ്ങനെയൊരു തീരുമാനം എടുത്തില്ലെന്ന്​ ഹോട്ടൽ അധികൃതർ ഒൗദ്യോഗികമായി അറിയിച്ചതോടെയാണ്​ സംഭവം വ്യാജനായിരുന്നുവെന്ന്​ ലോകം അറിഞ്ഞത്​. എന്നാൽ മാഞ്ചസ്​റ്റർ യുനൈറ്റഡി​​​െൻറ ഇതിഹാസ താരങ്ങളായ റ്യാൻ ഗിഗ്​സും ഗാരി നെവിലും തങ്ങളുടെ ഹോട്ടലുകൾ കോവിഡ്​ ആ​ശുപത്രികൾക്കായി വിട്ടുനൽകിയ വാർത്ത അധികമാരും അറിഞ്ഞതുമില്ല.

പുടി​​​െൻറ സിംഹക്കഥ വെറും ‘പൂച്ച’

കോവിഡ്​ കാലത്തെ അതിഗംഭീര നുണകളിലൊന്ന് റഷ്യൻ പ്രസിഡൻറ്​​ വ്ലാദിമിർ പുടിൻെറ പേരിലായിരുന്നു. ലോക്ക്​ഡൗണിലുള്ള റഷ്യൻ ജനത പുറത്തിറങ്ങാതിരിക്കാനായി 500 സിംഹ​ങ്ങളേയും കടുവകളേയും പുടിൻ തുറന്നുവിട്ടു എന്നായിരുന്നു വാർത്ത. ഈ ​െഎഡിയ കൊള്ളാമല്ലോ എന്ന പേരിൽ ചിത്രസഹിതം വാർത്ത സമൂഹമാധ്യമങ്ങളിൽ പറന്നുനടന്നിരുന്നു. എന്നാൽ, യുക്തിരഹിതമായ ഒന്നാന്തരം വ്യാജ വാർത്തയായിരുന്നു അത്​. കൂടെയുള്ള ചിത്രം 2016ൽ ദക്ഷിണാഫ്രക്കയി​ലെ െജാഹന്നാസ്​ബർഗിൽ റോഡിലിറങ്ങിയ സിംഹത്തി​​േൻറതായിരുന്നു. 

ഇറ്റലിലെ അരയന്നങ്ങളും ചൈനയിലെ ആനക്കൂട്ടവും

കോവിഡ്​ കാലത്തെ അതിമനോഹര ‘പരിസ്ഥിതി സൗഹാർദ’ നുണകളായിരുന്നു ഇറ്റലിയിലെ അരയന്നക്കൂട്ടവും ചൈനയിലെ ആനക്കൂട്ടവും. ഇറ്റലിയിൽ മനുഷ്യൻ വീടുകളിലേക്ക്​ ചുരുങ്ങിയതോടെ കനാൽ ജലം ശുദ്ധമായതിനാൽ അരയന്നങ്ങളും ശുദ്ധജലമത്സ്യങ്ങളും കൂട്ടമായി എത്തുന്നുവെന്ന അതിമനോഹര നുണ വ്യാപകമായി പ്രചരിച്ചിരുന്നു. എന്നാൽ, അരയന്നങ്ങളുടെ ചിത്രം ബുറാനോയിലെ കനാലുകളിൽ പതിവുള്ളവയായിരുന്നു. ഇറ്റാലിയൻ തീരങ്ങളിലെത്തുന്ന ഡോൾഫിനുകളുടെ ചിത്രമെന്ന പേരിൽ പ്രചരിച്ചത്​ മെഡിറ്ററേനിയയിൽ കടലിലെ സാർഡീനിയയിലെ ചിത്രങ്ങളായിരുന്നു. ചൈനയിലെ യുനാൻ പ്രവിശ്യയിലെ തോട്ടത്തിൽ ചോളവീഞ്ഞ്​ കുടിച്ചു മത്തുപിടിച്ചു മയങ്ങിക്കിടക്കുന്ന ആനക്കൂട്ടങ്ങളു​െട ചിത്രം എന്ന പേരിൽ പങ്കുവെച്ച പോസ്​റ്റ്​ പത്ത്​ലക്ഷത്തോളം പേർ ലൈക്ക്​ ചെയ്​തിരുന്നു. 

ഈ വാർത്തകളൊക്കെ വ്യാജമാണെങ്കിൽകൂടി, മനുഷ്യർ നഗരങ്ങളിൽ നിന്നും വീടുകളിൽ നിന്നും പിന്മാറിയതോടെ മലിനീകരണം പകുതിയോളമായി കുറഞ്ഞുവെന്നത്​ യാഥാർഥ്യം തന്നെയാണ്​. 

Loading...
COMMENTS