സർക്കസ്​ പ്രദർശനത്തിനിടെ സിംഹം പരിശീകനെ ആക്രമിച്ചു; വിഡിയോ വൈറൽ

മോസ്​കോ: എത്രതന്നെ പരിശീലനം നൽകി മെരുക്കിയെടുത്തതാണെന്ന്​ പറഞ്ഞാലും സർക്കസ്​ തമ്പുകളിൽ മൃഗങ്ങളെ ഉപയോഗിച്ചുള്ള അഭ്യാസങ്ങൾ അത്യന്തം അപകടം പിടിച്ച പ്രവർത്തിയാണെന്ന്​ പറയാതിരിക്കാനാകില്ല. ചെറുതായി ഒന്ന്​​ പിഴച്ചാൽ അത്​​ ജീവ​ൻ തന്നെ അപകടത്തിലാ​ക്കിയേക്കാം.

അത്തരത്തിൽ ഒരു അനുഭവത്തിനാണ്​ റഷ്യയിലെ സർക്കസ്​ കൂടാരത്തിൽ വെച്ച് ശനിയാഴ്ച​ സംഭവിച്ചത്​. റഷ്യയിലെ നോവോസിബിർസ്​ക്​ മേഖലയിൽ സർക്കസ്​ അഭ്യാസ പ്രകടനത്തിനിടെ ഒരു പെൺ സിംഹം പരിശീലകനെ ആക്രമിക്കുകയായിരുന്നു. ഇതുകണ്ട കാണികൾ പരിഭ്രാന്തരായി വേദി വിട്ട്​ ഓടി. പരിക്കേറ്റ മാക്സിം ഓർലോവ് എന്ന് പരിശീലകനെ ആശുപത്രിയിൽ പ്രവേശിപ്പിച്ചു. വേഗ എന്ന സിംഹമാണ്​ ഇയാളെ ആക്രമിച്ചത്​.

വേഗ, സാന്ത എന്ന്​ പേരായ സിംഹങ്ങൾ ആണ്​ ആദ്യം സർക്കസ്​ കൂടാരത്തിൽ പ്രത്യേകം സജ്ജമാക്കിയ വേദിയിലേക്ക്​ എത്തുന്നതാണ്​ വൈറൽ വിഡിയോയിൽ ആദ്യം കാണാനാകുക​. ഇരുവരും ആദ്യം തറയിൽ കിടന്ന്​ ചെറുതായി കലഹിക്കും. ഓർലോവ് എത്തുന്നതോടെ വേഗ കയറി ആക്രമിക്കുകയായിരുന്നു. ഓർലോവി​െൻറ കാലിലാണ്​ വേഗ കടിക്കാൻ നോക്കുന്നത്​. രക്ഷപ്പെടാനുള്ള അദ്ദേഹത്തി​െൻറ ആദ്യ ശ്രമം വിജയിച്ചുവെങ്കിലും വേഗ വീണ്ടും ആക്രമണവുമായെത്തി.

സർക്കസിലെ മറ്റ്​ ജീവനക്കാരുടെ സഹായ​ത്തോടെ രക്ഷപെ​ട്ടെങ്കിലും പരിക്കേറ്റ ഓർലോവിനെ ചികിത്സക്കായി ആശുപത്രിയിൽ പ്രവേശിപ്പിച്ചു. 'വേഗയ്ക്ക് അഞ്ച് വയസ്​ പ്രായമുണ്ട്. കുട്ടിക്കാലം മുതൽക്ക്​ തന്നെ അനുസരണയില്ലാത്ത സ്വഭാവമാണ്​. ഇത്തരം സംഭവം വളരെ അപൂർവമാണ്, പക്ഷേ മൃഗങ്ങൾ മൃഗങ്ങളാണെല്ലോ. ഒരു ചെറിയ സിംഹക്കുട്ടിയെ തരാൻ ഞങ്ങൾ മൃഗശാല അധികൃതരോട്​ സംസാരിക്കും' -ഓർലോവ് പറഞ്ഞു. മഹാമാരിക്കാലമായതിനാൽ മതിയായ പരിശീലനം നടത്താതെയാണ്​ സർക്കസ്​ അധികൃതർ പ്രദർശനം സംഘടിപ്പിച്ചതെന്ന്​ ഓർലേവ്​ കുറ്റപ്പെടുത്തി.

വീഡിയോ വൈറലായതിന്​ പിന്നാലെ സർക്കസുകളിൽ മൃഗങ്ങളെ ഉപയോഗിച്ചുള്ള അഭ്യാസപ്രകടനങ്ങൾ നിരോധിക്കണമെന്ന്​ ആവശ്യം ഉയർന്നു. റഷ്യയിൽ ഇത്തരത്തിൽ നിരവധി സംഭവങ്ങൾ റിപ്പോർട്ട്​ ചെയ്​തിട്ടുണ്ട്​.