ലോകത്തെ ചോക്​ലേറ്റ്​​ ഉൽപാദന മേഖലയിൽ വൻതോതിൽ ബാലവേല നടക്കുന്നെന്ന്​ പഠനം

ചിക്കാഗോ: ലോകത്തെ ചോക്​ലേറ്റ്​​ ഉൽപാദന മേഖലയിൽ വൻതോതിൽ ബാലവേല നടക്കുന്നതായി പുതിയ പഠനം. ചിക്കാഗോ യൂണിവേഴ്​സിറ്റിയുടെ നേതൃത്വത്തിൽ നടന്ന പഠനത്തിൽ 1.5മില്യൺ കുട്ടികൾ ഇൗ രംഗത്ത്​ ജോലി ചെയ്യുന്നതായി കണ്ടെത്തി​. ഇതിൽ അഞ്ചു വയസ് മാത്രം പ്രായമുള്ള കുട്ടികൾ വരെ ഉൾപെട്ടിട്ടുണ്ടെന്നാണ്​ കണക്ക്​.

ലോകത്തിൽ ഏറ്റവും കൂടുതൽ കൊകൊ ഉൽപാദിപ്പിക്കുന്ന രാജ്യങ്ങളാണ്​ ഘാനയും ​െഎവറി കോസ്​റ്റും. ഇൗ രാജ്യങ്ങളിൽ അഞ്ച്​ വയസ്സു മുതൽ 17 വയസ്സുവരെയുള്ള കുട്ടികൾ കൊകൊ ശേഖരണവും സംസ്​കരണവും മറ്റ്​ കഠിനമായ വിവിധ ജോലികളും ചെയ്​തുവരുന്നുണ്ട്​. മുമ്പ്​ ബാലവേല ചോക്​ലേറ്റ്​​ ഉൽപാദന രംഗത്തുനിന്ന്​ തുടച്ചു നീക്കണമെന്ന്​ അന്താരാഷ്​ട്ര കമ്പനികൾ വരെ വാദിച്ചിരുന്നെങ്കിലും അതൊന്നും പ്രാവർത്തികമായിട്ടില്ല എന്നതിലേക്കാണ്​ ഇൗ പഠനം വിരൽ ചൂണ്ടുന്നത്​.

1.5 മില്യൺ കുട്ടികളിൽ പകുതിയും ഘാന, ​െഎവറി കോസ്​റ്റ്​ എന്നീ രാജ്യങ്ങളിൽനിന്നുള്ളവരാണെന്നാണ്​ കണ്ടെത്തൽ. ഇവിടെ കുട്ടികൾ മാരകായുധങ്ങളുമായും ശരീരത്തിനെ ദോഷകരമായി ബാധിക്കുന്ന രാസ മാലിന്യങ്ങളുമായുമെല്ലാം ദീർഘ സമയം ജോലി ചെയ്യേണ്ടി വരുന്നുണ്ടെന്നും​ റിപ്പോർട്ടിൽ പറയുന്നു​. കഴിഞ്ഞ കാലയളവിൽ ലോകത്ത്​ 14 ശതമാനമായി ബാലവേലയുടെ കണക്ക്​ ഉയർന്നപ്പോൾ, കോകോ ഉൽപാദന രംഗത്ത്​ മാത്രം ഇത്​ 62 ശതമാനമായിരുന്നുവെന്നും റിപ്പോർട്ടിൽ ചൂണ്ടിക്കാണിക്കുന്നു.