ചൈനയിൽ ​പ്രതിദിന കോവിഡ്​ രോഗികളുടെ എണ്ണം മൂന്ന്​ മാസത്തെ ഉയർന്ന നിരക്കിൽ; കടുത്ത നിയന്ത്രണങ്ങളുമായി രാജ്യം

ബീജിങ്​: ചൈനയിൽ പ്രതിദിന കോവിഡ്​ രോഗികളുടെ മൂന്ന്​ മാസത്തെ ഉയർന്ന നിരക്കിലേക്ക്​ എത്തി. രോഗികളുടെ എണ്ണം ഉയരുന്ന സാഹചര്യത്തിൽ കടുത്ത നിയന്ത്രണങ്ങൾക്ക്​ ചൈനീസ്​ സർക്കാർ ഒരുങ്ങുന്നുവെന്ന്​ റിപ്പോർട്ട്​. അടുത്തയാഴ്ച ചൈനീസ്​ കമ്മ്യൂണിസ്റ്റ്​ പാർട്ടിയുടെ യോഗം ​ബീജിങ്ങിൽ നടക്കുന്നുണ്ട്​. ഈ യോഗത്തിൽ കൂടുതൽ നിയന്ത്രണങ്ങൾ പ്രഖ്യാപിക്കുമെന്നാണ്​ സൂചന.

ദേശീയ ആരോഗ്യ കമ്മീഷന്‍റെ കണക്ക്​ പ്രകാരം ബുധനാഴ്ച 93 പേർക്കാണ്​ കോവിഡ്​ ബാധിച്ചത്​. ആഗസ്റ്റ്​ ഒമ്പതിന്​ ശേഷം ചൈനയിലെ ഏറ്റവും ഉയർന്ന കോവിഡ്​ രോഗബാധയാണിത്​. ബീജിങ്ങിലും ഒമ്പത്​ പേർക്ക്​ രോഗം സ്ഥിരീകരിച്ചു. പ്രാദേശികമായി കോവിഡ്​ പകരുന്നത്​ ചൈനയെ ആശങ്കയിലാഴ്​ത്തിയിട്ടുണ്ട്​.

രോഗബാധ ഉയർന്നതോടെ ഷോപ്പിങ്​ മാളുകൾ, സൂപ്പർമാർക്കറ്റുകൾ, ഹോട്ടൽ, സിനിമ തിയറ്ററുകൾ, സബ്​വേ സ്​റ്റേഷൻ എന്നീ സ്ഥലങ്ങളിലെല്ലാം പ്രവേശിക്കുന്നതിന്​ കർശന നിയന്ത്രണമാണ്​ ഏർപ്പെടുത്തിയിരിക്കുന്നത്​. നഗരം വിട്ട്​ പുറത്ത്​ പോകുന്നത്​ ഒഴിവാക്കണമെന്ന്​ ബീജിങ്​ നഗരവാസികളോട്​ സർക്കാർ അധികൃതർ പറഞ്ഞു. വിവാഹങ്ങൾ മാറ്റിവെക്കണമെന്നും മരണാനന്തര ചടങ്ങുകളിൽ കുറച്ച്​ ആളുകൾ മാത്രം പ​ങ്കെടുത്താൽ മതിയെന്നും ഭരണകൂടം നിർദേശം. ബീജിങ്ങിലെ ഡാക്​സിങ്​ എയർപോർട്ടിലെ 60 ശതമാനം വിമാന സർവീസുകളും റദ്ദാക്കി.