ആറ്​ പേർക്ക്​ കോവിഡ്​; നഗരത്തിലെ മുഴുവൻ ജനങ്ങളേയും പരിശോധിക്കാൻ ചൈന

ബീജിങ്​: തുറമുഖ നഗരമായ ക്വിൻഡാവോയിലെ 90 ലക്ഷം പേർക്ക്​ അഞ്ച്​ ദിവസത്തിനുള്ളിൽ കോവിഡ്​ പരിശോധന നടത്താനൊരുങ്ങി ചൈന. നഗരത്തിൽ ആറ്​ പേർക്ക്​ രോഗബാധ സ്ഥിരീകരിച്ചതിനെ തുടർന്നാണ്​ നടപടി. മാസങ്ങൾക്ക്​ ശേഷമാണ്​ ചൈന ഇത്രയധികം ആളുകൾക്ക് ​ കോവിഡ്​ പരിശോധന നടത്തുന്നത്​.

ഞായറാഴ്​ചയാണ്​ ക്വിൻഡാവോയിൽ ആറ്​ പേർക്ക്​ രോഗബാധ സ്ഥിരീകരിച്ചത്​. ഉടൻ തന്നെ വിവിധ ​ആശുപത്രികളിൽ പല രോഗങ്ങൾക്ക്​ ചികിൽസയിലുള്ള മുഴുവൻ പേരെയും കോവിഡ്​ പരിശോധനക്ക്​ വിധേയമാക്കിയെന്ന്​ ഹെൽത്ത്​ കമീഷണർ അറിയിച്ചു.

അഞ്ച്​ ജില്ലകളിൽ മൂന്ന്​ ദിവസം കൊണ്ട്​ കോവിഡ്​ പരിശോധന നടത്തും. അഞ്ച്​ ദിവസത്തിനുള്ളിൽ നഗരത്തിലെ എല്ലാവരേയും പരിശോധനക്ക്​ വിധേയമാക്കുമെന്നും ചൈനീസ്​ അധികൃതർ അറിയിച്ചു. ജൂണിൽ ​ബീജിങ്ങിലും ചൈന സമാനരീതിയിൽ കോവിഡ്​ പരിശോധന നടത്തിയിരുന്നു. ഭക്ഷ്യമാർക്കറ്റിൽ നിന്ന്​ കോവിഡ്​ പടർന്നുവെന്ന സംശയത്തെ തുടർന്നായിരുന്നു കോവിഡ്​ പരിശോധന നടത്തിയത്​.