മാധ്യമപ്രവർത്തകയെ അറസ്​റ്റ്​ ചെയ്​തത്​ രാജ്യസുരക്ഷയെ മുൻനിർത്തി -ചൈന

ബെയ്​ജിങ്​: ആസ്​ട്രേലിയൻ അവതാരക ചെങ് ലേയിയെ അറസ്​റ്റ്​ ചെയ്​തത്​ രാജ്യസുരക്ഷ മുൻനിർത്തിയാണെന്ന്​ ചൈനയുടെ വിശദീകരണം. ചൈനീസ്​ വിദേശകാര്യമന്ത്രാലയമാണ്​ മാധ്യമപ്രവർത്തകയെ അറസ്​റ്റ്​ ചെയ്​ത്​ ദിവസങ്ങൾക്ക്​ ശേഷം വിശദീകരണവുമായി രംഗത്തെത്തിയത്​.

ആഗസ്​റ്റ്​ 14നാണ്​ സി.ജി.ടി.എൻ ടി.വിയുടെ ബിസിനസ്​ ജേണലിസ്​റ്റായ ചെങ്​ ലേയിയെ ചൈന അറസ്​റ്റ്​ ചെയ്​തത്​. എന്നാൽ, ഇക്കര്യത്തിൽ വിശദീകരണം നൽകാൻ അവർ തയാറായിരുന്നില്ല. ചൈനയുടെ സുരക്ഷക്ക്​ ഭീഷണിയാകുന്ന കാര്യങ്ങൾ ചെങ്​ ചെയ്​തുവെന്ന്​ വിദേശകാര്യമന്ത്രാലയം വക്​താവ്​ സാവോ ലിജിയാൻ പറഞ്ഞു. നിയമപരമായി കേസ്​ മ​ുന്നോട്ട്​ കൊണ്ടുപോകും. അവരുടെ അവകാശങ്ങളെല്ലാം പാലിക്കുമെന്നും ചൈനീസ്​ വിദേശകാര്യമന്ത്രാലയം അറിയിച്ചിട്ടുണ്ട്​.

നേര​െത്ത ചൈനീസ്​ സർക്കാറിനെ വിമർശിച്ച്​ ചെങ്​ ഫേസ്​ബുക്കിൽ കുറിപ്പിട്ടിരുന്നു. ഇവരുടെ അറസ്​റ്റിനുള്ള കാരണം ഇത്​ തന്നെയാണോയന്ന്​ വ്യക്​തമല്ല. അതേസമയം, മൈക്ക്​ സ്​മിത്ത്​, ബിൽ ബിർറ്റ്​ലീസ്​ എന്നീ രണ്ട്​ ആസ്​ട്രേലിയൻ മാധ്യമപ്രവർത്തകരെ ചൈന ചോദ്യം ചെയ്​തു. ഇതിന്​ പിന്നാലെ ഇരുവരും ചൈന വിട്ടുവെന്നാണ്​ വിവരം. ​