പാര്‍ലമെന്‍റിന്‍റെ സൂം മീറ്റിങ്ങില്‍ കനേഡിയന്‍ എം.പി പ്രത്യക്ഷ​പ്പെട്ടത്​ നഗ്​നനായി; ആകസ്​മികമെന്ന്​ വിശദീകരണവും ക്ഷമാപണവും

ഒട്ടാവ: പാര്‍ലമെന്‍റിന്‍റെ സൂം മീറ്റിങ്ങില്‍ കനേഡിയൻ എം.പി പ്രത്യക്ഷപ്പെട്ടത്​ നഗ്​നനായി. ലിബറൽ പാർട്ടി എം.പിയായ വില്യം ആമോസാണ്​ ഹൗസ് ഓഫ് കോമണ്‍സിന്‍റെ ഓണ്‍ലൈന്‍ മീറ്റിങ്ങില്‍ മറ്റ് എം.പിമാരുടെ മുന്നില്‍ നഗ്നനായി സ്‌ക്രീനിലെത്തിയത്. ബുധനാഴ്ച നടന്ന സംഭവത്തിന്‍റെ സ്​ക്രീൻ ഷോട്ടുകൾ കനേഡിയന്‍ മാധ്യമങ്ങള്‍ പുറത്തുവിട്ടതോടെ സംഭവം വിവാദമായി. തുടർന്ന്​ ക്ഷമാപണവുമായി വില്യം ആമോസ്​ രംഗത്തെത്തി. തന്‍റെ ഭാഗത്ത്​ നിന്നുണ്ടായത്​ ദൗർഭാഗ്യകരമായ പിഴവാണെന്ന്​ സമ്മതിച്ച അദ്ദേഹം എല്ലാവരോടും ക്ഷമ ചോദിച്ചു.

'ഞാൻ ഇന്ന്​ ദൗർഭാഗ്യകരമായ ഒരു പിഴവ്​ വരുത്തി, തീർച്ചയായും അതിൽ ലജ്​ജിക്കുന്നു. ജോഗിങ്ങിന്​ ശേഷം മീറ്റിങ്ങിൽ പ​ങ്കെടുക്കാനായി വസ്​ത്രം മാറുന്നതിനിടെ എന്‍റെ ക്യാമറ ആകസ്​മികമായി ഓൺ ആവുകയായിരുന്നു. പാർലമെന്‍റിലെ എന്‍റെ എല്ലാ സഹപ്രവർത്തകരോടും ആത്​മാർഥമായി ക്ഷമ ചോദിക്കുന്നു. അത്​ ശരിക്കുമൊരു പിഴവ്​ ആയിരുന്നു, ഇനിയൊരിക്കലും ആവർത്തിക്കുകയില്ല' -അദ്ദേഹം ട്വിറ്ററിൽ കുറിച്ചു.

ഇ​േന്‍റണല്‍ കോണ്‍ഫറന്‍സ് ഫീഡില്‍ ആയിരുന്നതിനാൽ പാര്‍ലമെന്‍റ്​ അംഗങ്ങളും ഉദ്യോഗസ്ഥരും മാത്രമേ ആമോസിനെ കണ്ടുള്ളൂ. അദ്ദേഹം സംസാരിക്കാഞ്ഞതിനാല്‍, ഇത്​ പൊതു ഫീഡില്‍ പ്രത്യക്ഷപ്പെട്ടില്ല. സംസാരിക്കാഞ്ഞതിനാൽ ഹൗസ്​ ഓഫ്​ കോമൺസിന്‍റെ പെരുമാറ്റച്ചട്ടലംഘനത്തിന്​ അദ്ദേഹത്തിനെതിരെ നടപടിയുണ്ടാകാനിടയില്ല. അതേസമയം, സംഭവത്തെ കുറിച്ച്​ പ്രതികരിക്കാൻ ലിബറൽ പാർട്ടി നേതാവും കനേഡിയൻ പ്രധാനമന്ത്രിയുമായ ജസ്റ്റിൻ ട്രൂഡോ തയാറായില്ല. അതേസമയം, പ്രതിപക്ഷ പാർട്ടികൾ ഇത്​ വലിയ വിവാദമാക്കിയിട്ടുണ്ട്​.