അഫ്​ഗാനിസ്​താനിൽനിന്ന്​ യു.എസ്​ സൈനിക പിന്മാറ്റം പ്രഖ്യാപിച്ച്​ ബൈഡൻ; സെപ്​റ്റംബർ 11ന്​ പൂർത്തിയാകും

കാബൂൾ: രണ്ടു പതിറ്റാണ്ടു നീണ്ട സൈനിക ഇടപെടൽ അവസാനിപ്പിച്ച്​ അഫ്​ഗാനിസ്​താനിൽനിന്ന്​ യു.എസ്​ സേന പിന്മാറ്റം പൂർണമാക്കാൻ ജോ ബൈഡൻ. 2001ലെ ഭീകരാക്രമണത്തിന്‍റെ 20ാം വാർഷികമായ സെപ്​റ്റംബർ 11നകം എല്ലാ സൈനികരെയും പിൻവലിക്കാനാണ്​ തീരുമാനം. ഇതുസംബന്ധിച്ച്​ ഔദ്യോഗിക പ്രഖ്യാപനം ബുധനാഴ്ച നടത്തു​മെന്നാണ്​ സൂചന.

2,500 യു.എസ്​ സൈനികരാണ്​ നിലവിൽ അഫ്​ഗാനിസ്​താനിലുള്ളത്​. 7,000 മറ്റു വിദേശ സൈനികരുമുണ്ട്​. അമേരിക്ക പിൻവലിക്കുന്നതിനൊപ്പം നാറ്റോ സഖ്യകക്ഷികളു​ം സൈനികരെ പിൻവലിച്ചേക്കും. മേയ്​ ഒന്നിന്​ പുതിയ പിന്മാറ്റം ആരംഭിക്കും. താലിബാനുമായി കഴിഞ്ഞ വർഷം ട്രംപ്​ ഭരണകൂടം എത്തിയ ധാരണയുടെ അടിസ്​ഥാനത്തിലാണിത്​. പിന്മാറ്റം പൂർത്തിയാകുന്നതോടെ അഫ്​ഗാനിസ്​താനിലെ യു.എസ്​ എംബസിക്കു മാത്രമാകും സുരക്ഷാ സൈനികർ കാവലുണ്ടാകുക.

2001ലെ സെപ്​റ്റംബർ 11 ആക്രമണത്തോടെ ആരംഭിച്ച യു.എസ്​ സൈനിക സാന്നിധ്യ കാലത്ത്​ എട്ടു ലക്ഷം സൈനികർ മാറിമാറി സേവനമനുഷ്​ഠിച്ചിട്ടുണ്ടെന്നാണ്​ കണക്ക്​. 2,300 പേർ കൊല്ലപ്പെട്ടിട്ടുണ്ട്​. 20,000​ പേർക്ക്​ പരിക്കേൽക്കുകയും ചെയ്​തു.

അതേ സമയം, ഇതേ കാലയളവിൽ അരലക്ഷം അഫ്​ഗാൻ സിവിലിയന്മാരും കൊല്ലപ്പെട്ടിട്ടുണ്ട്​.

അഫ്​ഗാനിൽ ശാശ്വത സമാധാനം ലക്ഷ്യമിട്ട്​ യു.എസ്​ കാർമികത്വത്തിൽ തുർക്കിയിൽ അടുത്ത ദിവസം ചർച്ചകൾക്കു തുടക്കം കുറിക്കാനിരിക്കുകയാണെങ്കിലും വിദേശ സൈനികരുടെ പൂർണ പിന്മാറ്റമില്ലാതെ പ​ങ്കെടുക്കില്ലെന്ന്​ താലിബാൻ വ്യക്​തമാക്കിയിട്ടുണ്ട്​.