അധികാര കൈമാറ്റത്തിന്​ ട്രംപ്​ തടസങ്ങളുണ്ടാക്കുന്നുവെന്ന പരാതിയുമായി ബൈഡന്‍

വാഷിംഗ്ടണ്‍: പ്രസിഡന്‍റായി ചുമതലയേല്‍ക്കുന്നതിന് ദിവസങ്ങള്‍ മാത്രം അവശേഷിക്കെ സുഗമമായ അധികാര കൈമാറ്റത്തിന് ട്രംപ് ടീം തടസങ്ങള്‍ സൃഷ്ടിക്കുന്നുവെന്ന പരാതിയുമായി നിയുക്​ത പ്രസിഡന്‍റ്​ ജോ ബൈഡന്‍. നാഷണല്‍ സെക്യൂരിറ്റി ആന്‍ഡ് ഫോറിന്‍ പോളിസി ഏജന്‍സി ടീം അംഗങ്ങളുമായി ബൈഡന്‍ നടത്തിയ വെര്‍ച്വല്‍ മീറ്റിംഗിലാണ് ട്രംപിനെതിരെ ആക്ഷേപം ഉന്നയിച്ചത്​.

കഴിഞ്ഞ നവംബര്‍ 23-നാണ് അധികാര കൈമാറ്റത്തിന്​ ട്രംപ് ഭരണകൂടം അനുവാദം നല്‍കിയത്. തെരഞ്ഞെടുപ്പില്‍ കൃത്രിമം നടന്നെന്ന്​ ആരോപിച്ച്​ അധികാര കൈമാറ്റത്തിന്​ വിമുഖത പ്രകടിപ്പിച്ചിരുന്നു ട്രംപ്. ഇപ്പോഴും അധികാരം കൈമാറുന്നതിനുള്ള നടപടികള്‍ വൈകിപ്പിക്കുകയാണെന്നാണ്​ ബൈഡന്‍ ചൂണ്ടിക്കാട്ടുന്നത്​

എല്ലാ കോടതികളും ട്രംപിന്‍റെ തെരഞ്ഞെടുപ്പ് കേസുകള്‍ക്കെതിരേ മുഖംതിരിച്ചിരുന്നു. ജനുവരി ആറിന് നടക്കുന്ന ഇലക്ടറല്‍ വോട്ടുകള്‍ എണ്ണി തിട്ടപ്പെടുത്തി ബൈഡന്‍റെ വിജയം ഔദ്യോഗികമായി പ്രഖ്യാപിക്കുന്ന യുഎസ് കോണ്‍ഗ്രസിന്‍റെ മീറ്റിംഗ് ജനാധിപത്യ മര്യാദകള്‍ ലംഘിച്ച് അട്ടിമറിക്കാനാണ് ട്രംപ് ശ്രമിക്കുന്നതെന്നും ബൈഡന്‍ പറഞ്ഞു. ജനുവരി 20-ന് നടക്കുന്ന അധികാര കൈമാറ്റ ചടങ്ങുകള്‍ക്ക് മുമ്പ് യു.എസ് ഹൗസും, സെനറ്റും സം യുക്തമായി വിജയിയെ പ്രഖ്യാപിക്കേണ്ടതുണ്ട്. ഇതുവരെ ട്രംപ് പരാജയം പരസ്യമായി അംഗീകരിക്കാത്ത സാഹചര്യത്തില്‍ ജനുവരി ആറിന് എന്തു സംഭവിക്കുമെന്ന് കാത്തിരുന്നു കാണേണ്ടി വരും.