നെതന്യാഹുവിനെ നേരിട്ട്​ വിളിച്ച്​ ഇസ്രായേൽ ആക്രമണത്തിന്​​ പിന്തുണ അറിയിച്ച്​ ബൈഡൻ

വാഷിങ്​ടൺ: ഗസ്സയിൽ ഹമാസ്​ കേന്ദ്രങ്ങളെ ലക്ഷ്യമിടുന്നുവെന്ന പേരിൽ കുരുതി തുടരുന്ന ഇസ്രായേലിന്​ പിന്തുണ ഉറപ്പുനൽകി യു.എസ്​ പ്രസിഡൻറ്​ ജോ ബൈഡൻ. ശനിയാഴ്​ച ഇസ്രായേൽ പ്രധാനമന്ത്രി ​ബിൻയമിൻ നെതന്യാഹുവിനെയും ഫലസ്​തീൻ പ്രസിഡൻറ്​ മഹ്​മൂദ്​ അബ്ബാസിനെയും നേരിട്ട്​ ഫോണിൽ വിളിച്ചാണ്​ പിന്തുണ ഉറപ്പുനൽകിയത്​. ഹമാസ്​ റോക്കറ്റാക്രമണം അടിയന്തരമായി അവസാനിപ്പിക്കാൻ നടപടി സ്വീകരിക്കണമെന്ന്​ മഹ്​മൂദ്​ അബ്ബാസിനോട്​ ആവശ്യപ്പെടുകയും ചെയ്​തു.

''ഈ പുതിയ സംഘർഷം ഇസ്രായേലിലും ഫലസ്​തീനിലും കുട്ടികളുൾപെടെ സാധാരണക്കാരുടെ ജീവൻ അപഹരിച്ചിട്ടുണ്ട്​. ഗസ്സയിലെ ഹമാസും മറ്റു തീവ്രവാദികളും നടത്തുന്ന റോക്കറ്റാക്രമണങ്ങൾക്കെതിരെ ഇ​സ്രായേലിന്​ സ്വയം പ്രതിരോധിക്കാനുള്ള അവകാശത്തിന്​ ഉറച്ച പിന്തുണ നൽകുന്നു. ഇസ്രായേലിലുടനീളം പട്ടണങ്ങളും നഗരങ്ങളും ലക്ഷ്യമിട്ട്​ നടത്തുന്ന വിവേചനമില്ലാത്ത ആക്രമണങ്ങളെ അപലപിക്കുകയും ചെയ്യുന്നു''- വൈറ്റ്​ഹൗസ്​ പ്രസ്​താവനയിൽ അറിയിച്ചു.

മേഖലയിൽ പുതുതായി ശക്​തിയാർജിച്ച മുസ്​ലിം- ജൂത വർഗീയ സംഘർഷങ്ങളിൽ ബൈഡൻ നടുക്കമറിയിച്ചു.

അതേ സമയം, അമേരിക്കൻ പ്രസിഡൻറുമായി സംഭാഷണ ശേഷം ഗസ്സയിൽ ആക്രമണം തുടരുമെന്ന്​ ഇസ്രായേൽ പ്രധാനമന്ത്രി ​ബിൻയമിൻ നെതന്യാഹു വ്യക്​തമാക്കി. ഇനിയും റോക്കറ്റ്​ തൊടുക്കാൻ അർഹര​ല്ല ഹമാസെന്ന്​ പഠിപ്പിക്കുകയാണ്​ ​ലക്ഷ്യമെന്ന്​ നെതന്യാഹു പറഞ്ഞു. ഇസ്രായേൽ ആക്രമണങ്ങൾക്ക്​ ശക്​തമായ പിന്തുണ അമേരിക്ക വാഗ്​ദാനം ചെയ്​ത സാഹചര്യത്തിലാണ്​ ഇനിയും ആക്രമിക്കാൻ തീരുമാനം.