''പ്രക്ഷോഭകരെ വെടിവെക്കരുത്​'; മ്യാൻമർ സേനക്കു മുന്നിൽ മുട്ടുകുത്തി കരഞ്ഞുകൈകൂപ്പി കന്യാസ്​ത്രീ; വൈറലായി വിഡിയോ

യാംഗോൺ: മ്യാൻമറിലെ മയിറ്റ്​കിന നഗരത്തിൽ പ്ര​തിഷേധവുമായി എത്തിയ നാട്ടുകാർക്കു നേരെ തോക്കുപിടിച്ചു വെടിവെക്കാൻ ഒരുങ്ങിനിന്ന സേനയെ പിന്തിരിപ്പിക്കാൻ​ കന്യാസ്​ത്രീയുടെ ധീര ശ്രമങ്ങൾക്ക്​ ലോകത്തി​െൻറ കൈയടി. തൂവെള്ള വസ്​ത്രത്തിൽ നഗരത്തിലെത്തിയ കന്യാസ്​ത്രീ പട്ടാളക്കാർക്കു മുന്നിൽ മുട്ടുകുത്തി കരഞ്ഞുകൈകൂപ്പി നിന്ന്​ പ്രതിഷേധക്കാർക്കു പകരം ത​ന്നെ വെടിവെക്കാൻ ആവശ്യപ്പെടുകയാണ്​.

'ഇവിടെ പ്രശ്​നം തുടരുന്നതു ഇഷ്​ടമല്ല, പൊലീസ്​ പിൻവാങ്ങുംവരെ ഞാൻ പിൻവാങ്ങുകയുമില്ല''- ഇതായിരുന്നു അവരുടെ ധീര നിലപാട്​. കുട്ടികളെ വെടിവെക്കരുതെന്നായിരുന്നു താൻ അവരോട്​ യാചിച്ചതെന്ന്​ പിന്നീട്​ കന്യാസ്​ത്രീ മാധ്യമങ്ങളോട്​ പറഞ്ഞു.

ഇവർ ഇതേ നിൽപ്​ തുടർന്നതോടെ ചുറ്റുമുണ്ടായിരുന്ന രണ്ടു പൊലീസുകാരും പത്തിതാഴ്​ത്തി നെറ്റി നിലത്തുവെച്ച്​ മാപ്പപേക്ഷയുടെ സ്വരത്തിൽനിന്നു.

ഇവിടെ തിങ്കളാഴ്​ച നടന്ന പ്രതിഷേധത്തിനിടെ പൊലീസ്​ വെടിവെപ്പിൽ രണ്ടു പേർ കൊല്ലപ്പെട്ടിരുന്നു. മൂന്നു പേർക്ക്​ പരിക്കേൽക്കുകയും ചെയ്​തു. ഇതിനെ തുടർന്നായിരുന്നു കന്യാസ്​ത്രീയുടെ ഇട​െപടൽ.

ടോങ്​ എന്നു പേരുള്ള ഇവർ കഴിഞ്ഞ മാസവും സമാനമായി പൊലീസ്​ വെടിവെപ്പി​െൻറ സമയത്ത്​ ഇടപെട്ടിരുന്നു.

രാജ്യത്ത്​ തുടരുന്ന പ്രതിഷേധത്തിനിടെ പൊലീസ്​ വെടിവെപ്പിൽ ഇതുവരെ 60ലേറെ പേർ കൊല്ലപ്പെട്ടിട്ടുണ്ട്​. 1,800 ലേറെ പേരെ അറസ്​റ്റ്​ ചെയ്യുകയും ചെയ്​തതതായാണ്​ കണക്കുകൾ.