'ഞങ്ങൾക്ക്​ ഇന്ത്യയിലേക്ക്​ വരേണ്ട ഗതികേടില്ല'; അമിത്​ ഷായുടെ 'പട്ടിണി' പരാമർശത്തോട്​ പ്രതികരിച്ച്​ ബംഗ്ലാദേശ്​

ധാക്ക: സ്വന്തം രാജ്യത്ത്​ ഭക്ഷണം ലഭിക്കാത്ത സാഹചര്യമുള്ളതിനാൽ, ബംഗ്ലാദേശിലുള്ള പാവങ്ങൾ ഇന്ത്യയിലേക്ക്​ കുടിയേറുകയാണെന്ന ആഭ്യന്തര മന്ത്രി അമിത്​ ഷായുടെ പ്രസ്​താവനയോട്​ പ്രതികരിച്ച്​ ബംഗ്ലാദേശ്​. അമിത്​ ഷായുടെ ബംഗ്ലാദേശിനെ കുറിച്ചുള്ള അറിവ്​ പരിമിതമാണെന്ന്​ വിദേശകാര്യ മന്ത്രി എ.കെ അബ്ദുൾ മോമിൻ പറഞ്ഞു. ബംഗ്ലാദേശും ഇന്ത്യയും തമ്മിൽ ഏറെ ആഴത്തിലുള്ള ബന്ധം കാത്തുസൂക്ഷിക്കുന്ന സാഹചര്യത്തിലുള്ള ഇത്തരം പരാമർശങ്ങൾ സ്വീകാര്യമല്ലെന്നും അത്​ തെറ്റിധാരണ സൃഷ്​ടിക്കുമെന്നും അദ്ദേഹം വ്യക്​തമാക്കി.

ബംഗ്ലാദേശിൽ ആരും പട്ടിണി കാരണം മരിക്കുന്നില്ലെന്നും രാജ്യത്തിന്‍റെ വടക്കൽ ജില്ലകളിൽ ദാരിദ്ര്യവും പട്ടിണിയും നിലനിൽക്കുന്നില്ലെന്നും മോമിൻ പറഞ്ഞു. പല മേഖലകളിലും അമിത്​ ഷായുടെ രാജ്യത്തേക്കാൾ ഏറെ മുന്നിലാണ്​ ബംഗ്ലാദേശ്​, ബംഗ്ലാദേശിലെ 90 ശതമാനം ആളുകളും നല്ല ശൗചാലയങ്ങൾ ഉപയോഗിക്കുന്നു, ഇന്ത്യയിൽ 50 ശതമാനത്തിലധികം ആളുകൾക്ക് ശരിയായ ശൗചാലയങ്ങളില്ല എന്നും മോമിൻ തുറന്നടിച്ചു.

ബംഗ്ലാദേശിൽ വിദ്യാസമ്പന്നർക്ക്​ ജോലി കുറവുള്ള സാഹചര്യമുണ്ടെങ്കിലും വിദ്യാഭ്യാസം കുറവുള്ളവർക്ക്​ അത്തരം ക്ഷാമമില്ലെന്ന്​ മന്ത്രി പറഞ്ഞു. ഇന്ത്യയിൽ നിന്ന്​ ഒരു ലക്ഷത്തിലധികം ആളുകൾ ബംഗ്ലാദേശിൽ ജോലി ചെയ്യുന്നുണ്ട്​. നമുക്ക്​ ഇന്ത്യയിലേക്ക്​ പോവേണ്ട ആവശ്യമില്ലെന്നും അദ്ദേഹം കൂട്ടിച്ചേർത്തു.

ദാരിദ്ര്യം കാരണം ബംഗ്ലാദേശിൽ നിന്നും ഇന്ത്യയിലേക്ക്​ ആളുകൾ ഒഴുകുന്നുവെന്ന്​ പറഞ്ഞ അമിത്​ ഷാ, പശ്ചിമ ബംഗാളിൽ ബി.ജെ.പിയെ വിജയിപ്പിച്ചാൽ, ബംഗ്ലാദേശിൽ നിന്നുള്ള നുഴഞ്ഞുകയറ്റം അവസാനിപ്പിക്കുമെന്നും വാഗ്​ദാനം ചെയ്​തിരുന്നു.