താലിബാന്​ സുരക്ഷിത താവളമൊരുക്കുന്നത്​ പാകിസ്​താൻ- യു.എന്നിൽ തുറന്നടിച്ച് അഫ്​ഗാൻ

ന്യൂയോർക്ക്: രാജ്യത്ത്​ ആക്രമണങ്ങൾ അഴിച്ചുവിടുന്ന താലിബാന്​ സുരക്ഷിത താവളമൊരുക്കുന്നത്​ പാകിസ്​താൻ ആണെന്ന്​ ​െഎക്യരാഷ്​ട്ര സഭയിൽ തുറന്നടിച്ച് അഫ്​ഗാനിസ്​താൻ. യു.എൻ രക്ഷാസമിതി യോഗത്തിൽ അഫ്​ഗാന്‍റെ സ്​ഥി​രം പ്രതിനിധി ഗുലാം എം. ഇസക്​സായ്​ ആണ്​ പാകിസ്​താനെതി​െര രംഗത്തെത്തിയത്​. പാകിസ്​താൻ താലിബാന്​ സുരക്ഷിത താവളമൊരുക്കുക മാത്രമല്ല, ആവശ്യമായ യുദ്ധ സാമഗ്രികൾ വിതരണം ചെയ്യുന്നുണ്ടെന്നും അദ്ദേഹം പറഞ്ഞു.

ഇന്ത്യ അധ്യക്ഷത വഹിക്കുന്ന യു.എൻ രക്ഷാസമിതിയിൽ അഫ്ഗാൻ വിദേശകാര്യ മന്ത്രി ഹനീഫ് ആത്മറിന്‍റെ ആവശ്യപ്രകാരമാണ്​ ഇന്ത്യയുടെ വിദേശകാര്യ മന്ത്രി ഡോ. എസ്. ജയശങ്കറിന്‍റെ നിർദേശപ്രകാരം അഫ്​ഗാൻ പ്രശ്​നം ചർച്ച ചെയ്യുന്നത്​. യുദ്ധക്കെടുതിയിൽ വലയുന്ന അഫ്​ഗാനിൽ 'പ്രാകൃത പ്രവൃത്തികൾ' നടത്തുന്ന താലിബാൻ തനിച്ചല്ലെന്നും ​ വിദേശ തീവ്രവാദ ശൃംഖലകളിൽ നിന്നും അവർക്ക്​ സഹായം ലഭിക്കുന്നുണ്ടെന്നും ഗുലാം ചൂണ്ടിക്കാട്ടി. അഫ്ഗാനിലെ മാത്രമല്ല, മേഖലയിലെയും പുറത്തെയും സമാധാനത്തിനും സുരക്ഷക്കും സുസ്ഥിരതക്കും താലിബാൻ ഭീഷണിയാണ്​. അൽ ഖ്വയ്​ദ, ലശ്​കറെ ത്വയിബ, തെഹ‌്‌രീകെ താലിബാൻ, പാകിസ്​താൻ,ഐ.എസ് ഉൾപ്പെടെ 20 സംഘടനകളിലെ 10,000ലേറെ വിദേശ പോരാളികളുടെ നേരിട്ടുള്ള പിന്തുണ താലിബാന്​ ഉണ്ടെന്നും അദ്ദേഹം ചൂണ്ടിക്കാട്ടി.

അഫ്​ഗാനിലേക്ക് പ്രവേശിക്കാന്‍ താലിബാന്‍കാർ ഡ്യുറന്‍ഡ് ലൈനിന് സമീപം ഒത്തുകൂടുന്നതും അവരുടെ ഫണ്ട് ശേഖരണ പരിപാടികളും കൂട്ട ശവസംസ്‌കാരത്തിനായി മൃതദേഹങ്ങള്‍ കൈമാറുന്നതും പാകിസ്താന്‍ ആശുപത്രികളില്‍ പരിക്കേറ്റ താലിബാന്‍കാർക്ക്​ ചികിത്സ നൽകുന്നതുമൊക്കെ ഗ്രാഫിക് റിപ്പോര്‍ട്ടുകളും വീഡിയോകളും ഉയര്‍ത്തിക്കാട്ടി അദ്ദേഹം വിശദീകരിച്ചു. താലിബാ​ന്‍റെ അക്രമങ്ങൾ കാരണം രാജ്യത്തെ സ്ഥിതി അതിവേഗം വഷളായ സാഹചര്യത്തിലാണ്​ അടിയന്തര യോഗം വിളിക്കാൻ നിർബന്ധിതമായതെന്നും ഗുലാം പറഞ്ഞു.