അമേരിക്കയും താലിബാനും സമാധാന കരാറിൽ ഒപ്പുവെച്ചു

ദോഹ: യു.എസും താലിബാനും സമാധാന കരാറിൽ ഒപ്പുവെച്ചു. ഖത്തർ തലസ്ഥാനമായ ദോഹയിൽ​ വെച്ചാണ്​​ അഫ്​ഗാനിസ്താനിൽ സമാധ ാനം പുനഃസ്ഥാപിക്കുന്നതിനുള്ള കരാറിൽ ഒപ്പുവെച്ചത്​. രണ്ടു വര്‍ഷമായി തുടര്‍ന്നു വരുന്ന ചര്‍ച്ചകള്‍ക്കൊടുവില ാണ് ചരിത്ര കരാറിലൊപ്പിടുന്നത്.

ഇന്ത്യ, പാകിസ്​താൻ തുടങ്ങിയ രാജ്യങ്ങളും ദോഹയിൽ കരാർ ഒപ്പുവെക്കുന്നതിന്​ സാക്ഷിയായിരുന്നു. ഗൾഫ്​ മേഖലയിൽ ശാശ്വതമായ സമാധാനം കരാർ മൂലം ഉണ്ടാകുമെന്നാണ്​ പ്രതീക്ഷിക്കുന്നത്​. അഫ്ഗാനിസ്ഥാനിലെ അമേരിക്കന്‍ സൈന്യത്തിൻെറ എണ്ണം കുറക്കുന്നതുള്‍പ്പടെയുള്ള കാര്യങ്ങള്‍ ചര്‍ച്ചയില്‍ തീരുമാനമായതായി അന്തർദേശീയ മാധ്യമങ്ങൾ റിപ്പോര്‍ട്ട് ചെയ്തു.

19 വർഷങ്ങൾക്ക്​ മുമ്പാണ്​ യു.എസ്​ അഫ്​ഗാനിസ്​താനിൽ അധിനിവേശം നടത്തിയത്​. 9/11 ഭീകരാക്രമണത്തിൻെറ വേരുകൾ തകർക്കുന്നതിനായിരുന്നു അഫ്​ഗാനിസ്​താനിലെ അധിനിവേശം എന്നാണ്​ യു.എസ്​ പറഞ്ഞിരുന്നത്​. അഫ്​ഗാനിസ്​താനിലെ സൈനിക നടപടിക്കിടെ 2,400 യു.എസ്​ സൈനികർ കൊല്ലപ്പെട്ടുവെന്നാണ്​ റിപ്പോർട്ട്​. നിലവിൽ 12,000 യു.എസ്​ സൈനികരാണ്​ അഫ്​ഗാനിസ്​താനിലുള്ളത്​. 135 ദിവസം കൊണ്ട് സൈന്യത്തിന്റെ എണ്ണം 8,600 ആയി ചുരുക്കും. പതിനാല് മാസം കൊണ്ട് അമേരിക്കന്‍ സൈന്യത്തെ പൂര്‍ണ്ണമായും മേഖലയില്‍ നിന്നും പിന്‍വലിക്കുമെന്നും അമേരിക്ക അറിയിച്ചു.