പാകിസ്​താനിൽ കോവിഡ് രോഗികൾ 25,000 കവിഞ്ഞു; 594 മരണം 

ഇസ്​ലാമാബാദ്​: പാകിസ്​താനിൽ കോവിഡ്​ ബാധിതരുടെ എണ്ണം 25,000 കവിഞ്ഞു. കഴിഞ്ഞ 24 മണിക്കൂറിനുള്ളിൽ 1,764 പേർക്കാണ്​ രോഗം സ്​ഥിരീകരിച്ചത്​. ഇതോ​െട മൊത്തം രോഗബാധിതരുടെ എണ്ണം 25,837 ആയി. 30 പേർ കൂടി മരിച്ചതോ​െട ആകെ മരണസംഖ്യ 594 ആയി.

ലോക്ഡൗൺ പിൻവലിക്കുന്നതിന് മണിക്കൂറുകൾക്ക് മുമ്പാണ്, പ്രതിദിന രോഗബാധിതരുടെ എണ്ണത്തിൽ വെള്ളിയാഴ്​ച വൻ വർധനവ്​ രേഖപ്പെടുത്തിയത്​. രാജ്യം കടുത്ത സാമ്പത്തിക മാന്ദ്യത്തിലേക്ക് കൂപ്പുകുത്തുന്ന സാഹചര്യത്തിലാണ്​ ശനിയാഴ്ച മുതൽ ലോക്​ഡൗൺ പിൻവലിക്കു​െമന്ന്​ പ്രധാനമന്ത്രി ഇമ്രാൻ ഖാൻ പ്രഖ്യാപിച്ചത്​. 

ദരിദ്രരായ പൗരന്മാരെ സഹായിക്കുകയെന്ന ലക്ഷ്യത്തോടെയാാണ്​ നിയന്ത്രണങ്ങൾ ഘട്ടംഘട്ടമായി ലഘൂകരിക്കുന്നതെന്ന്​ അദ്ദേഹം പറഞ്ഞു. കോവിഡിനെതിരെ മുൻകരുതലുകൾ എടുക്കണമെന്നും സ്​ഥിതി വഷളായാൽ നിയന്ത്രണങ്ങൾ പുനഃസ്ഥാപിക്കാമെന്നും അദ്ദേഹം കൂട്ടിച്ചേർത്തു.

വിരലിലെണ്ണാവുന്ന കേസുകൾ മാത്രമാണ്​ ഫെബ്രുവരി അവസാനം വരെ പാകിസ്​താനിൽ റിപ്പോർട്ട്​ ചെയ്​തിരുന്നത്​. എന്നാൽ, മാർച്ച് പകുതി മുതൽ എണ്ണം വർധിക്കാൻ തുടങ്ങി. കഴിഞ്ഞയാഴ്ച പ്രതിദിനം ശരാശരി ആയിരത്തിലധികം കേസുകളും 27 മരണവും റിപ്പോർട്ട് ചെയ്തു.

ചെറിയ മാർക്കറ്റുകളും ഷോപ്പുകളുമാണ്​ ശനിയാഴ്​ച മുതൽ സമയപരിധിയോടെ തുറക്കുക. വലിയ മാളുകളും മറ്റും അടച്ചിടും. സ്കൂളുകൾക്ക്​ ജൂലൈ പകുതി വരെ അവധി പ്രഖ്യാപിച്ചിട്ടുണ്ട്​. ഗതാഗതം പുനരാരംഭിക്കുന്ന തീയതി പിന്നീട്​ അറിയിക്കും.