​കോവിഡി​െൻറ രണ്ടാം വരവിൽ​ ആശങ്ക​; ബെയ്​ജിങ്ങിൽ 1200ലേറെ വിമാനങ്ങൾ റദ്ദാക്കി

ബെയ്​ജിങ്​: കോവിഡ്​ കേസുകൾ വീണ്ടും റി​േപ്പാർട്ട്​ ചെയ്​തതോടെ നിയന്ത്രണങ്ങൾ കടുപ്പിച്ച്​ ചൈനയുടെ തലസ്ഥാനമായ ബെയ്​ജിങ്​. ബുധനാഴ്​ച രാവിലെയോടെ 1225 വിമാനങ്ങൾ റദ്ദാക്കി. ബെയ്​ജിങ്ങിലെ പ്രധാന വിമാനത്താവളങ്ങളിൽ നിന്ന്​ പുറപ്പെട​ുന്നതും എത്തിച്ചേരുന്നതുമായ വിമാന സർവീസുകളുടെ 70 ശതമാനത്തോളം വരും ഇത്​. കോവിഡി​​​െൻറ രണ്ടാം തരംഗമാണിതെന്നാണ്​ കരുതുന്നത്​.

രോഗബാധ കുറഞ്ഞതിനെ തുടർന്ന്​ തുറന്നു പ്രവർത്തിച്ച സ്​കൂളുകളെല്ലാം അടച്ചു. ക്ലാസുകൾ ഓൺലൈൻ മുഖേനയാക്കി. പഴം-പച്ചക്കറി മൊത്തക്കച്ചവട മാർക്കറ്റ​ുമായി ബന്ധപ്പെട്ടാണ് നഗരത്തിൽ​ കോവിഡ്​ വ്യാപിച്ചതെന്നാണ്​ കരുതുന്നത്​. മെയ്​ 30 മുതൽ രണ്ട്​ ലക്ഷത്തിലേറെ ആളുകൾ ഇൗ മാർക്കറ്റിൽ എത്തിയതായാണ്​ അധികൃതർ പറയുന്നത്​. ഇവിടുത്തെ 8000ത്തോളം വരുന്ന ജോലിക്കാരെ കോവിഡ്​ പരിശോധനക്ക്​ വിധേയമാക്കുകയും ക്വാറൻറീനിലാക്കുകയും ചെയ്​തു. 

ബ​ുധനാഴ്​ച 31 പേർക്കാണ്​ പുതുതായി കോവിഡ്​ സ്ഥിരീകരിച്ചത്​. ഇതോടെ ജനങ്ങളോട്​ വീടുകളിൽ നിന്ന്​ പുറത്തിറങ്ങരു​െതന്ന്​ അധികൃതർ നിർദേശം നൽകി. േകാവിഡ്​ ബാധിതരുമായി സമ്പർക്കത്തിലേർപ്പെട്ടതായി കരുതുന്ന ആയിരക്കണക്കിനാളുകളെ പരിശോധനക്ക്​ വിധേയമാക്കിയിട്ടുണ്ട്​. നഗരത്തിൽ ജനങ്ങൾ തിങ്ങിപ്പാർക്കുന്ന ഏകദേശം 30 സ്ഥലങ്ങൾ അടച്ചിട്ടിരിക്കുകയാണ്​. ബെയ്​ജിങ്ങിൽ നിന്നുള്ള യാത്രക്കാർ പ്രവേശിക്കുന്നതിന്​ ചൈനയിലെ​ പല പ്രവിശ്യകളും വിലക്കേർപ്പെട​ുത്തിയിട്ടുണ്ട്​. ബെയ്​ജിങ്ങിൽ കോവിഡ്​ മഹാമാരിയുടെ സാഹചര്യം അതീവ ഗുരുതരമാണെന്ന്​ നഗര വക്താവ്​ ഷു ഹെജിയാൻ അറിയിച്ചു. 

കോവിഡ്​ വ്യാപനത്തി​​​െൻറ പശ്ചാത്തലത്തിൽ ബെയ്​ജിങ്​ നഗരത്തിലെ 11 മാർക്കറ്റുകൾ അടക്കുകയും ആയിരക്കണക്കിന്​ ഭക്ഷ്യ, പാനീയ വ്യാപാരങ്ങൾ അണുവിമുക്തമാക്കുകയും ചെയ്​തു. ബുധനാഴ്​ച രോഗം സ്ഥിരീകരിച്ച ലക്ഷണങ്ങളില്ലാ​ത്ത ആറ്​ പേരും ലക്ഷണങ്ങളുള്ള രണ്ട്​ പേരും ഉൾപ്പെടെ കഴിഞ്ഞ ആറ്​ ദിവസംകൊണ്ട്​ 137 പേർക്കാണ്​ നഗരത്തിൽ കോവിഡ്​ സ്ഥിരീകരിച്ചത്​. 

LATEST VIDEO