അതിർത്തിയിലെ ഉത്തര കൊറിയൻ യുദ്ധായുധങ്ങൾ നീക്കംചെയ്​തേക്കും

സോൾ: ഇരു കൊറിയകൾക്കുമിടയിലെ സമാധാന ശ്രമങ്ങളുടെ ഭാഗമായി അതിർത്തിയിലെ യുദ്ധായുധങ്ങൾ മാറ്റുന്നതു​ സംബന്ധിച്ച്​ ചർച്ചചെയ്യുമെന്ന്​ ദക്ഷിണ കൊറിയൻ പ്രധാനമന്ത്രി. ദക്ഷിണ കൊറിയൻ തലസ്​ഥാനമായ സോളിനടക്കം ഭീഷണിയാകുന്ന രീതിയിൽ ആയിരത്തോളം കൂറ്റൻ യുദ്ധോപകരണങ്ങൾ അതിർത്തിയിൽ ഉത്തര കൊറിയ ഒരുക്കിയിട്ടുണ്ട്​. 

കഴിഞ്ഞ മാസങ്ങളിൽ ഇരു രാജ്യങ്ങൾക്കുമിടയിൽ സമാധാനത്തിനായി നടക്കുന്ന ചർച്ചകളുടെ ഭാഗമായാണ്​ പതിറ്റാണ്ടുകളായി ഭീഷണിയായ ആയുധങ്ങൾ നീക്കുന്നത്​ ചർച്ചക്ക്​ വന്നതെന്ന്​ കൊറിയൻ യുദ്ധാരംഭത്തി​​​െൻറ 68ാം വാർഷികത്തോടനുബന്ധിച്ച്​ സംഘടിപ്പിച്ച പരിപാടിയിൽ ദക്ഷിണ കൊറിയൻ പ്രധാനമന്ത്രി ലീ യാക്​ യോൻ പറഞ്ഞു. 

ഇത്തരമൊരു നീക്കം നടക്കുന്നതായി നേരത്തേ വിവിധ മാധ്യമങ്ങൾ റിപ്പോർട്ട്​ ചെയ്​തിരുന്നു. എന്നാൽ, ആദ്യമായാണ്​ കൊറിയൻ രാഷ്​ട്രീയ നേതൃത്വം ഇക്കാര്യം സ്​ഥിരീകരിക്കുന്നത്​. ഇരു കൊറിയകളുടെയും ഉന്നത സൈനിക നേതൃത്വം വിവിധ വിഷയങ്ങൾ ചർച്ച ചെയ്യാൻ തിങ്കളാഴ്​ച യോഗം ചേർന്നിട്ടുണ്ട്​. ഇൗ യോഗത്തിൽ യുദ്ധായുധങ്ങൾ നീക്കുന്നത്​ സംബന്ധിച്ച്​ തീരുമാനമുണ്ടാകുമെന്നാണ്​ കരുതുന്നത്​.

അതിനിടെ, കൊറിയൻ യുദ്ധ വാർഷികത്തിൽ എല്ലാ വർഷവും ഉത്തര കൊറിയ നടത്തുന്ന ‘അമേരിക്കൻ അധിനിവേശ വിര​ുദ്ധ റാലി’ ഇത്തവണ ഉപേക്ഷിച്ചു. കിം ജോങ്​ ഇന്നും യു.എസ്​ പ്രസിഡൻറ്​ ഡോണൾഡ്​ ട്രംപും തമ്മിൽ സിംഗപ്പൂരിൽ നടന്ന കൂടിക്കാഴ്​ചയുടെ പശ്ചാത്തലത്തിലാണ്​ നീക്കമെന്നാണ്​ വിലയിരുത്തപ്പെടുന്നത്​.