പാക്​ പ്രധാനമന്ത്രി നേപ്പാളിൽ പ്രചണ്ഡയുമായി ചർച്ച നടത്തി

കാഠ്​മണ്ഡു: നേപ്പാൾ സന്ദർശിക്കുന്ന പാക്​ പ്രധാനമന്ത്രി ​ശാഹിദ്​ ഖാഖാൻ അബ്ബാസി മാവോയിസ്​റ്റ്​ പാർട്ടി നേതാവ്​​ പ്രചണ്ഡയുമായി ചർച്ച നടത്തി. രണ്ടു ദിവസത്തെ സന്ദർശനത്തിനായി തിങ്കളാഴ്​​ചയാണ്​ അദ്ദേഹം നേപ്പാളിലെത്തിയത്​. ​കാഠ്​മണ്ഡുവിലായിരുന്നു ചർച്ച. ​ഇരു രാജ്യങ്ങളും തമ്മിലുള്ള ഉഭയകക്ഷി ബന്ധം, പരസ്​പര സഹകരണം എന്നിവ ചർച്ചയായതായി പ്രചണ്ഡ പറഞ്ഞു.

‘സാർക്ക്​’ കൂട്ടായ്​മയുടെ പ്രവർത്തനങ്ങൾ പുനരുജ്ജീവിപ്പിക്കുന്ന നടപടികൾ സംബന്ധിച്ചും ചർച്ച നടന്നു. ഉറി ഭീകരാക്രമണത്തെ തുടർന്ന്​ 2016 നവംബർ 26ന്​ ഇസ്​ലാമാബാദിൽ നട​ക്കേണ്ടിയിരുന്ന 19ാമത്​ സാർക്ക്​ ഉച്ചകോടി ഇന്ത്യയുടെ എതിർപ്പിനെത്തുടർന്ന്​ മുടങ്ങിയിരുന്നു. ഇന്ത്യക്ക്​ പിന്തുണയുമായി മറ്റ്​ അംഗരാജ്യങ്ങളും പാകിസ്​താനെതിരെ രംഗത്തുവന്നിരുന്നു. ഇൗ സാഹചര്യത്തിലാണ്​ പാക്​ പ്രധാനമന്ത്രി പ്രശ്​നങ്ങൾ പരിഹരിച്ച്​ സാർക്ക്​ അംഗരാജ്യങ്ങളെ ശക്തിപ്പെടുത്താൻ മുന്നിട്ടിറങ്ങിയത്​. 1994ന്​ ശേഷം ആദ്യമായാണ്​ ഒരു പാക്​ പ്രധാനമന്ത്രി നേപ്പാളിൽ ഉഭയകക്ഷി സന്ദർശനം നടത്തുന്നത്​.