അമേരിക്ക പ്രത്യാഘാതം നേരിടേണ്ടിവരും -ഇറാൻ

തെഹ്റാൻ: ജനറൽ സുലൈമാനി വധത്തിലൂടെ രാജ്യാന്തര ഭീകരവാദമാണ് അമേരിക്ക നടപ്പാക്കുന്നതെന്ന് ഇറാൻ വിദേശകാര്യ മന്ത്രി മുഹമ്മദ് ജാവേദ് ശരീഫ്. ഐ.എസ്, അൽ നുസ്റ, അൽ ഖായിദ എന്നിവക്കെതിരെ ശക്തമായ പോരാട്ടമാണ് ഇറാൻ സേന നടത്തുന്നത്. അങ്ങേയറ്റം അപകടകരവും ബുദ്ധിശ്യൂനവുമായ നടപടിയാണിത്. ഈ തെമ്മാടിത്തത്തിന്‍റെ പ്രത്യാഘാതങ്ങളുടെ ഉത്തരവാദിത്തം അമേരിക്കക്ക് തന്നെയായിരിക്കുമെന്നും ജാവേദ് ശരീഫ് ട്വീറ്റ് ചെ‍യ്തു.

ബഗ്ദാദിലെ വിമാനത്താവളത്തിൽ യു.എസ് നടത്തിയ വ്യോമാക്രമണത്തിൽ ഇസ്​ലാമിക് റവല്യൂഷണറി ഗാര്‍ഡ് തലവൻ ഖാസിം സുലൈമാനി ഉൾപ്പടെ എട്ടുപേർ കൊല്ലപ്പെട്ടതിന് പിന്നാലെയാണ് വിദേശകാര്യ മന്ത്രി ശക്തമായി പ്രതികരിച്ചത്.

ഖാസിം സുലൈമാനിയെ കൂടാതെ ഇറാന്‍ പിന്തുണയുള്ള ഇറാഖിലെ പൗരസേനകളുടെ ഡെപ്യൂട്ടി കമാന്‍ഡറായ അബു മഹ്ദി അല്‍ മുഹന്ദിസും കൊല്ലപ്പെട്ടവരിൽ ഉൾപ്പെടുന്നു.