ഇസ്രായേലിൽ ലോക്​ഡൗൺ ലംഘിച്ച്​ മതചടങ്ങ്​; 300 പേർ അറസ്​റ്റിൽ

തെൽ അവീവ്​: ലോക്​ഡൗൺ നിയന്ത്രണങ്ങൾ ലംഘിച്ച് മതചടങ്ങ്​ സംഘടിപ്പിച്ച 300 ഓളം പേരെ ഇസ്രായേൽ പൊലീസ് അറസ്റ്റ് ചെയ്തു. വടക്കൻ ഇസ്രായേലിലെ മെറോൺ പർവതത്തിൽ ചൊവ്വാഴ്​ച രാത്രിയാണ്​ സംഭവം. 

ലാഗ് ബി ഒമർ എന്ന ജൂതപുരോഹിത​​​​െൻറ ഓർമദിനാചരണത്തിന്​ ആയിരക്കണക്കിന്​ തീവ്ര യാഥാസ്​തിക ജൂതമത വിശ്വാസികൾ ഒരുമിച്ചുകൂടുകയായിരുന്നു. മുൻവർഷങ്ങളിൽ നടത്താറുള്ളതുപോലെ നൃത്തവും ദീപാലങ്കാരവുമായാണ്​ ജനക്കൂട്ടം ശവകുടീരത്തിൽ തടിച്ചുകൂടിയത്​.  

ഇവരെ നിയന്ത്രിക്കാൻ ശ്രമിക്കുന്നതിനിടെ പൊലീസ്​ ഉദ്യോഗസ്ഥർക്ക്​ നേരെ ആക്രമണശ്രമമുണ്ടായതായും ഇസ്രായേൽ മാധ്യമങ്ങൾ റിപ്പോർട്ട്​ ചെയ്​തു. ചിലർ പൊലീസിനുനേരെ കല്ലും മറ്റ് വസ്തുക്കളും എറിഞ്ഞു. കോവിഡ്​ നിയന്ത്രണത്തി​​​​െൻറ ഭാഗമായി 20ലധികം പേർ കൂടിച്ചേരുന്ന സമ്മേളനങ്ങൾ ഇസ്രായേലിൽ  നിരോധിച്ചിരുന്നു. 

ഇസ്രായേലിൽ കൊറോണ വൈറസ് ബാധിതരിൽ അധികവും തീവ്ര യാഥാസ്​തിക ജൂത സമൂഹമാണെന്ന്​ ആ​േരാഗ്യമന്ത്രാലയം പുറത്തുവിട്ട കണക്കുകൾ വ്യക്​തമാക്കുന്നു.  സ്ഥിരീകരിച്ച 16,500 കേസുകളിൽ 70 ശതമാനവും തീവ്ര ഓർത്തഡോക്സ് വിശ്വാസികളാണെന്നാണ്​ ആഭ്യന്തരമന്ത്രി ആര്യ ഡെറി കഴിഞ്ഞദിവസം പറഞ്ഞത്​. ഇസ്രായേൽ ജനസംഖ്യയുടെ 12 ശതമാനമാണ്​ ഈ വിഭാഗം.  രാജ്യത്ത്​ ഇതുവരെ 260 മരണങ്ങളാണ്​ റിപ്പോർട്ട് ചെയ്തത്​.