മുൻ ഇൻറർപോൾ മേധാവിക്കെതിരെ ചൈന അഴിമതിക്കേസ്​ ചുമത്തി

ബെയ്​ജിങ്​: ചൈനയുടെ കസ്​റ്റഡിയിലുള്ള മുൻ ഇൻറർപോൾ മേധാവി മെങ്​ ഹോങ്​വെയ്​ക്കെതിരെ അഴിമതിക്കേസ്​ ചുമത്തി. 13 ദിവസമായി കാണാതായ ഇദ്ദേഹം കസ്​റ്റഡിയിലുണ്ടെന്ന്​ കഴിഞ്ഞ ദിവസമാണ്​ സ്​ഥിരീകരിച്ചത്​. ഇതിന്​ പിന്നാലെ ഇൻറർപോൾ പ്രസിഡൻറ്​ സ്​ഥാനം മെങ്​ രാജിവെച്ചതായി അധികൃതർ അറിയിക്കുകയും ചെയ്​തിരുന്നു.

അഴിമതിക്കേസിലാണ്​ മെങ്ങിനെ കസ്​റ്റഡിയിലെടുത്തതെന്ന്​ ചൈനീസ്​ പൊതു സുരക്ഷാ മന്ത്രാലയമാണ്​ പ്രസ്​താവനയിറക്കിയത്​. മെങ്​ രാജ്യത്തെ നിയമത്തെ ലംഘിച്ചതായി കണ്ടെത്തിയതായും ചൈനീസ്​ സർക്കാർ വെബ്​സൈറ്റിൽ പ്രസിദ്ധീകരിച്ച കുറിപ്പിൽ ആരോപിക്കുന്നു.

ലോകത്തെ ഏറ്റവും സുപ്രധാന അന്വേഷണ ഏജൻസിയുടെ മേധാവിയെ ദിവസങ്ങളോളം കാണാതായത്​ കഴിഞ്ഞ വെള്ളിയാഴ്​ചയാണ്​ പുറംലോകമറിഞ്ഞത്​. ഇതിനെ തുടർന്ന്​ ഫ്രാൻസിൽ കഴിയുന്ന ഇദ്ദേഹത്തി​​​െൻറ ഭാര്യ ഗ്രേസ്​ വെള്ളിയാഴ്​ച വാർത്തസമ്മേളനം നടത്തി.

ചൈന സന്ദർശനത്തിനു​ പോയ ഭർത്താവിനെക്കുറിച്ച് കഴിഞ്ഞമാസം 25 മുതൽ ഒരു വിവരവുമില്ലെന്ന്​ അവർ മാധ്യമങ്ങളോട്​ വെളിപ്പെടുത്തി. അവസാനമായി അയച്ച മെസേജ്​ ഒരു കത്തിയുടെ ചിത്രമാണെന്നും അപകടത്തിൽ പെട്ടതായാണ്​ കരുതുന്നതെന്നും ഇവർ പറഞ്ഞിരുന്നു. ഇതി​​​െൻറ തുടർച്ചയായാണ്​ ചൈനീസ്​ വൃത്തങ്ങൾ കസ്​റ്റഡി സ്​ഥിരീകരിച്ച്​ രംഗത്തെത്തിയത്​.

നേരത്തേ ചൈനീസ്​ വംശജനായ ഒരാൾ ഇൻറർപോൾ തലപ്പത്തെത്തിയത്​ കമ്യൂണിസ്​റ്റ്​ ഭരണകൂടത്തിന്​ സഹായകമായെന്ന്​ വിമർശനമുണ്ടായിരുന്നു. എന്നാൽ, ദൈനംദിന പ്രവർത്തനങ്ങളിൽ മെങ്​ ഇടപെടാറില്ലെന്ന്​ ഇൻറർപോൾ ഇതിന്​ മറുപടി നൽകിയിരുന്നു. ഇപ്പോഴത്തെ അറസ്​റ്റിന്​ പിന്നിൽ രാഷ്​ട്രീയ കാരണങ്ങളുണ്ടോ എന്നത്​ വ്യക്തമായിട്ടില്ല.