തായ്​വാൻ-ചൈന പുനരേകീകരണം ആർക്കും തടയാനാകില്ലെന്ന്​ ചൈനീസ്​ പ്രതിരോധ മന്ത്രി

21:14 PM
21/10/2019

ബെയ്​ജിങ്​: തായ്​വാ​​​െൻറ ചൈനയുമായുള്ള പുനരേകീകരണം ഒരു ശക്തിക്കും തടയാനാകില്ലെന്ന്​ ചൈനീസ്​ പ്രതിരോധ മന്ത്രി വെയ്​ ഫെങ്​ഷെ പറഞ്ഞു. തലസ്​ഥാനത്ത്​ നടന്ന സമ്മേളനത്തിൽ സംസാരിക്കുകയായിരുന്നു അദ്ദേഹം. തായ്​വാൻ പ്രശ്​നപരിഹാരം ചൈനയുടെ ഏറ്റവും വലിയ ദേശീയ താൽപര്യങ്ങളിൽ ഒന്നാണ്​. അവിടത്തെ വിഘടന പ്രവർത്തനങ്ങൾ പരാജയപ്പെടുകതന്നെ ചെയ്യുമെന്നും അദ്ദേഹം കൂട്ടിച്ചേർത്തു. ഇനിയും ഏകീകരണം പൂർത്തിയാകാത്ത ലോകത്തെ വലിയ രാജ്യം ചൈന മാത്രമാണ്​. ചൈനീസ്​ ജനത ഏകീകരണത്തിനായി ഏറെ നാളുകളായി കാത്തിരിക്കുകയാണ്​. അത്​ കാലത്തി​​​െൻറ ആവശ്യമാണ്​. ദേശീയ താൽപര്യം മുൻനിർത്തിയുള്ള ശരിയായ നടപടിയുമാണത്​​ -മന്ത്രി കൂട്ടിച്ചേർത്തു. 

 ചൈന, വിമത പ്രവിശ്യയായാണ്​ തായ്​വാനെ കാണുന്നത്​. ആവശ്യമെങ്കിൽ ബലപ്രയോഗത്തിലൂടെ അത്​ പിടിച്ചെടുക്കണമെന്നാണ്​ അവർ കരുതുന്നത്​. ഇക്കാര്യം ചൈനീസ്​ പ്രസിഡൻറ്​ ഷി ജിൻപിങ്​ ഈ വർഷം ആദ്യം വ്യക്തമാക്കിയിരുന്നു. ജനാധിപത്യത്തിനുവേണ്ടി നിലകൊള്ളുന്ന രാജ്യമായാണ്​ തായ്​വാൻ സ്വയം വിലയിരുത്തുന്നത്​. അവർ ചൈനയുടെ ഏകാധിപത്യ നിലപാടിനെ ശക്തമായി എതിർത്തുവരുകയാണ്​. ചൈനയുടെ നിലപാടുകൾ മേഖലയുടെ സമാധാനത്തിനു തന്നെ ഭീഷണിയാണെന്നാണ്​ തായ്​വാൻ പറയുന്നത്​. തായ്​വാന്​ യു.എസ്​ പിന്തുണ ലഭിക്കുന്നതും ചൈനയെ ചൊടിപ്പിക്കുന്നുണ്ട്​. തായ്​വാനുമായി അമേരിക്കക്ക്​ ആയുധ ഇടപാട്​ ഉൾപ്പെടെ സജീവ ബന്ധമുണ്ട്​. വാഷിങ്​ടണിന്​ തായ്​പെയുമായി ഔദ്യോഗിക ബന്ധമില്ലെങ്കിലും അവർക്ക്​ എല്ലാ പിന്തുണയും നൽകുന്നുണ്ട്​.

 ജനുവരിയിൽ തായ്​വാനിൽ പ്രസിഡൻറ്​ തെരഞ്ഞെടുപ്പ്​ നടക്കാനിരിക്കെ, ചൈന-തായ്​വാൻ സംഘർഷം വീണ്ടും പുകഞ്ഞു തുടങ്ങിയിട്ടുണ്ട്​.  രണ്ടാം ലോക യുദ്ധം അവസാനിച്ച ശേഷം ചിയാങ്​ കെയ്​ ഷെകി​​​െൻറ നേതൃത്വത്തിലുള്ള ചൈനീസ്​ ദേശീയ വാദികളും (കുമിൻറാങ്ങുകൾ) മാവോ സെതൂങ്ങി​​​െൻറ നേതൃത്വത്തിലുള്ള ചൈനീസ്​ കമ്യൂണിസ്​റ്റ്​ പാർട്ടിയും തമ്മിലുള്ള ആഭ്യന്തര യുദ്ധം ശക്തമായി. ഇത്​ 1949ൽ ദേശീയ വാദികളെ തകർത്ത്​ ‘പീപ്​ൾസ്​ റിപബ്ലിക്​ ഓഫ്​ ചൈന’ കമ്യൂണിസ്​റ്റുകൾ സ്​ഥാപിക്കുന്നതിൽ കലാശിച്ചു. നാലു തലസ്​ഥാനങ്ങളും പിടിവിട്ടതോടെ ചിയാങ്​ ദേശീയ സർക്കാറിനെ തായ്​വാനി​ലേക്ക്​ മാറ്റുകയും തായ്​പെയ്​ താൽക്കാലിക തലസ്​ഥാനമായി പ്രഖ്യാപിക്കുകയുമായിരുന്നു

Loading...
COMMENTS