അൽ ഖ്വയ്​ദയുടെ ദക്ഷിണേഷ്യൻ കമാൻഡർ കൊല്ലപ്പെ​ട്ടെന്ന്​ റിപ്പോർട്ട്​

കാബുൾ: അൽ ഖ്വയ്​ദയുടെ ദക്ഷിണേഷ്യൻ കമാൻഡറെ യു.എസ്​ -അഫ്​ഗാൻ സംയുക്ത റെയ്​ഡിൽ വധിച്ചതായി റിപ്പോർട്ട്​. അൽ ഖ്വയ്​ദ ഇന്ത്യൻ സബ്​കോൺഡിനൻറൽ വിങ്ങിനെ നയിച്ചിരുന്ന അസിം ഉമർ എന്നയാളാണ്​ അഫ്​ഗാനിസ്​താനിൽ വെച്ച്​ കൊല്ലപ്പെട്ടത്​.

ദക്ഷിണ അഫ്​ഗാനിലെ മൂസ ഖ്വാല ജില്ലയിൽ സെപ്​തംബർ 23നാണ്​ യു.എസ്​ സൈന്യത്തി​​െൻറ നേതൃത്വത്തിൽ റെയ്​ഡ്​ നടന്നത്​. റെയ്​ഡിൽ ആറ്​ അൽ ഖ്വയ്​ദ തീവ്രവാദികൾ കൊല്ലപ്പെട്ടു. കൊല്ലപ്പെട്ടവരിൽ മിക്കവരും പാക്​ പൗരൻമാരാണ്​. അസിം ഉമറിനും പാക്​ പൗരത്വമാണുള്ളത്​. ഇയാൾ ഇന്ത്യയിലാണ്​ ജനിച്ചതെന്നും റിപ്പോർട്ടുണ്ടെന്ന്​ അഫ്​ഗാൻ ദേശീയ സുരക്ഷാ ഏജൻസി അറിയിച്ചു.

സെപ്​തംബർ 22,23 തീയതികളിലാണ്​ യു.എസ്​ വ്യോമസേന പിന്തുണയോടെ അഫ്​ഗാൻ സൈന്യം റെയ്​ഡ്​ നടത്തിയത്​. വ്യോമാക്രമണത്തിൽ കുട്ടികൾ ഉൾപ്പെടെ 40 ഓളം സാധാരണക്കാർ കൊല്ലപ്പെ​ട്ടെന്നും റിപ്പോർട്ടുണ്ട്​.

അതേസമയം, അസിം ഉമർ കൊല്ലപ്പെ​ട്ടെന്ന വാർത്ത അഫ്​ഗാൻ താലിബാൻ നിഷേധിച്ചു. ഭീകരർ ഒളിഞ്ഞിരിക്കുന്നുവെന്ന സംശയത്തിൽ പ്രദേശത്തെ വിവാഹചടങ്ങ്​ നടക്കുന്ന വേദിയിലുണ്ടായ സൈനിക നടപടിയിൽ സാധാരണക്കാരായ നിരവധിപേർ കൊല്ലപ്പെടുകയും പരിക്കേൽക്കുകയും ചെയ്​തിരുന്നുവെന്നും ഇത്​ മൂടിവെച്ചുകൊണ്ടാണ്​ അസിം കൊല്ലപ്പെ​ട്ടെന്ന വ്യാജ വാർത്ത പ്രചരിപ്പിച്ചതെന്നും താലിബാൻ വൃത്തങ്ങൾ ആരോപിച്ചു.