ഉ.കൊറിയയുടെ ഹ്രസ്വദൂര മിസൈല്‍ പരീക്ഷണം വിജയം

പ്യോങ്യാങ്:  അമേരിക്കയുള്‍പ്പെടെയുള്ള രാജ്യങ്ങളുടെ ഉപരോധങ്ങള്‍ അവഗണിച്ച് ഉ.കൊറിയ വീണ്ടും മിസൈല്‍ പരീക്ഷിച്ചു. തിങ്കളാഴ്ച അഞ്ച് ഹ്രസ്വദൂര മിസൈലുകളാണ് ഉ.കൊറിയ വിജയകരമായി വിക്ഷേപിച്ചതെന്ന് മാധ്യമങ്ങള്‍ റിപ്പോര്‍ട്ട് ചെയ്തു. ഏതാനും ദിവസങ്ങള്‍ക്കുമുമ്പ്, രണ്ട് മധ്യ ദൂര മിസൈലുകളും ഉ.കൊറിയ പരീക്ഷിച്ചിരുന്നു. മേഖലയില്‍ യുദ്ധസമാന അന്തരീക്ഷം നിലനില്‍ക്കെയാണ് ഉ.കൊറിയയുടെ നടപടികള്‍. ദ.കൊറിയ-അമേരിക്ക സംയുക്ത സൈനികാഭ്യാസം സോളില്‍ പുരോഗമിക്കവെയാണ് ഉ.കൊറിയ രണ്ട് മിസൈല്‍ പരീക്ഷണങ്ങള്‍ നടത്തിയതെന്നതും ശ്രദ്ധേയമാണ്. ജനുവരി ആറിന് ഉ. കൊറിയ അണുപരീക്ഷണം നടത്തിയെന്നും അവകാശപ്പെട്ടിരുന്നു.