കമലാ ഹാരിസി​ന്‍റെ പ്രചാരണത്തിന് ഉത്തേജനമേകാൻ എ.ആർ. റഹ്മാ​​ന്‍റെ മ്യൂസിക് വിഡിയോ

വാഷിംങ്ടൺ: യു.എസ് ​പ്രസിഡന്‍റ് തെരഞ്ഞെടുപ്പിൽ ദക്ഷിണേഷ്യൻ വോട്ടർമാർക്കിടയിൽ കമലാ ഹാരിസിനുള്ള പിന്തുണ വർധിപ്പിക്കുന്നതിന്‍റെ ഭാഗമായി ഇന്ത്യൻ സംഗീത സംവിധായകൻ എ.ആർ റഹ്മാ​ന്‍റെ സംഗീത വിഡിയോ ഒരുങ്ങുന്നു. വൈസ് പ്രസിഡന്‍റ് കമലാ ഹാരിസിനെ പിന്തുണച്ച് 30 മിനിറ്റുള്ള വിഡിയോ തയ്യാറായിക്കഴിഞ്ഞു. ആഗോളതലത്തിൽ പ്രശസ്തനായ ഇന്ത്യൻ സംഗീത സംവിധായകനും സംഗീതജ്ഞനുമായ റഹ്മാ​ന്‍റെ സംഗീത പരിപാടി നവംബർ 5ന് നടക്കുന്ന പൊതു തെരഞ്ഞെടുപ്പിനുള്ള പ്രചാരണത്തിന് വലിയ ഉത്തേജനം നൽകുമെന്ന് സംഘാടകർ പ്രതീക്ഷിക്കുന്നു.

ഇന്ത്യൻ-ആഫ്രിക്കൻ വംശജയായ ഹാരിസിനെ പിന്തുണക്കുന്ന ഏഷ്യയിൽ നിന്നുള്ള പ്രധാന അന്താരാഷ്ട്ര കലാകാരനാണ് 57കാരനായ റഹ്മാൻ. ‘ഈ പ്രകടനത്തിലൂടെ അമേരിക്കയുടെ പുരോഗതിക്കും പ്രാതിനിധ്യത്തിനും വേണ്ടി നിലകൊള്ളുന്ന നേതാക്കളുടെയും കലാകാരന്മാരുടെയും ഒരു കൂട്ടത്തിലേക്ക് എ.ആർ റഹ്മാൻ ത​ന്‍റെ ശബ്ദവും ചേർത്തുവെച്ചതായി ഇതി​ന്‍റെ പിന്നിൽ പ്രവർത്തിച്ച ‘എഎപിഐ വിക്ടറി ഫണ്ട്’ ചെയർമാൻ ശേഖർ നരസിംഹൻ പറഞ്ഞു.

കേവലം ഒരു സംഗീത പരിപാടി എന്നതിലുപരി വോട്ടുചെയ്യാനുള്ള തങ്ങളുടെ കമ്യൂണിറ്റികളോടുള്ള ആഹ്വാനമാണിതെന്നും അദ്ദേഹം പറഞ്ഞു. ഇത് AAPI വിക്ടറി ഫണ്ടി​ന്‍റെ യൂ ടൂബ് ചാനലിൽ ഞായറാഴ്ച രാത്രി 8 മണിക്ക് പ്രക്ഷേപണം ചെയ്യും. പുറമെ എ.വി.എസ്, ടി.വി ഏഷ്യ ഉൾപ്പെടെയുള്ള പ്രധാന ദക്ഷിണേഷ്യൻ നെറ്റ്‌വർക്കുകളിൽ ഉടനീളവും പ്രക്ഷേപണം ചെയ്യും. റഹ്മാ​ന്‍റെ ഏറ്റവും പ്രിയപ്പെട്ട ഗാനങ്ങൾ 30 മിനിറ്റ് ദൈർഘ്യമുള്ള ഷോയിൽ അവതരിപ്പിക്കുമെന്ന് സംഘാടകർ അറിയിച്ചു. എഎപിഐ വിക്ടറി ഫണ്ട് യൂട്യൂബിൽ ഒരു ടീസർ വിഡിയോയും പുറത്തിറക്കിയിട്ടുണ്ട്. അതിൽ എ.ആർ റഹ്മാനും ഇന്ത്യസ്പോറ സ്ഥാപകൻ എം.ആർ രംഗസ്വാമിയും പ്രകടനത്തിനായി തയ്യാറെടുക്കുന്നതായി കാണാം.