ആപ്പിൾ കൈയിൽ സൂക്ഷിച്ചതിന്​ യുവതിക്ക്​ 500 ഡോളർ പിഴ

ഡോക്​ടർമാ​െര അകറ്റാൻ ഒരു ദിവസം ഒരാപ്പിൾ ആകാമെന്നാണ്​ ചൊല്ല്​​. എന്നാൽ ഒരാപ്പിൾ കൈവശം സൂക്ഷിച്ചതിന്​ 500 ഡോളർ പിഴ നൽകേണ്ടി വന്നിരിക്കയാണ്​  കൊളറാഡോയിലെ ക്രിസ്​റ്റൽ ടാഡ്​ലോക്കിന്​. 

ബുധനാഴ്​ച പാരീസിൽ നിന്ന്​ ഡെൽറ്റ വിമാനത്തിൽ യു.എസിലെ ഡെൻവറിലേക്ക്​ യാത്ര തിരിച്ചതായിരുന്നു​ ക്രിസ്​റ്റൽ. യാത്രക്കിടെ വിമാനത്തിൽ നിന്ന്​ ലഭിച്ച ആപ്പിൾ പിന്നീട്​ കഴിക്കാമെന്ന്​ കരുതി പൊതിഞ്ഞ്​ കൈയിൽ സൂക്ഷിച്ചു. വിമാനമിറങ്ങിയപ്പോൾ നടത്തിയ പരിശോധനയിൽ കസ്​റ്റംസ്​ ഉദ്യോഗസ്​ഥർ ആപ്പിൾ പിടികൂടുകയായിരുന്നു. 

ഒരുപാട്​ ചെലവ്​ വരുന്ന യാത്രയാണോ ഇ​െതന്ന്​ കസ്​റ്റംസ്​ ഏജൻറ്​ ത​​​െൻറ അടുത്തെത്തി അന്വേഷിപ്പോൾ​ തനിക്ക്​ കാര്യം പിടികിട്ടിയില്ലെന്ന്​ ക്രിസ്​റ്റൽ പറയുന്നു. അതെ എന്ന്​ മറുപടി നൽകി. എന്നാൽ ചെലവ്​ വീണ്ടും കൂട്ടാൻ 500 ഡോളർ പിഴകൂടി ചുമത്തുന്നു​െവന്ന്​ ഏജൻറ്​ അറിയിച്ചു. പിന്നീടാണ്​ വിമാനത്തിൽ ആപ്പിൾ കൊണ്ടുവരാൻ പാടില്ല എന്നറിഞ്ഞത്​. 500 ഡോളർ പിഴയടച്ച ശേഷം മാത്രമേ വിട്ടയക്കൂവെന്ന്​ കസ്​റ്റംസ്​ നിർബന്ധം പിടിച്ചുവെന്ന്​​ ​ക്രിസ്​റ്റൽ അറിയച്ചു. ഒരു പഴത്തി​​​െൻറ പേരിൽ, അത്​ വിമാനത്തിൽ നിന്നു തന്നെ ലഭിച്ചതായിട്ടും യാത്രക്കാരോട്​ കുറ്റവാളികളോടെന്നപോലെ ​െപരുമാറുന്നത്​ നിർഭാഗ്യകരമാണെന്ന്​ ​ക്രിസ്​റ്റൽ ടാഡ്​ലോക്ക്​ പറഞ്ഞു. 

എന്നാൽ വിമാനത്തിൽ ഭക്ഷണപദാർഥങ്ങൾ വിതരണം ചെയ്യുന്നത്​ യാത്രക്കിടെ തന്നെ കഴിക്കുമെന്ന്​ കരുതിയാണെന്ന്​ വിമാന അധികൃതർ അറിയിച്ചു. കസ്​റ്റംസ്​-അതിർത്തി സുരക്ഷാ നയങ്ങളും നിർദേശങ്ങളും കൃത്യമായി പാലിക്കാൻ യാത്രക്കാരോട്​ ആവശ്യപ്പെടു​മെന്നും ഡെൽറ്റ എയർലൈൻസ്​ വാർത്താകുറിപ്പിൽ അറിയിച്ചു. കാർഷിക ഉത്​പന്നങ്ങൾ ഒരു രാജ്യത്തു നിന്ന്​​ മറ്റൊരു രാജ്യത്തേക്ക്​ കൊണ്ടുവരുന്നത്​ നിരോധിച്ചതാണെന്ന്​ കസ്​റ്റംസ്​ ഏജൻറ്​ അറിയിച്ചു.