​ഉയിഗുർ മുസ്​ലിംകൾക്കെതിരായ ക്രൂരത: ചൈനീസ്​ കമ്യൂണിസ്​റ്റ്​ പാർട്ടി നേതാക്കൾക്ക്​ യു.എസ്​ വിലക്ക്​

വാഷിങ്​ടൺ: ചൈനീസ്​ കമ്യൂണിസ്​റ്റ്​ പാർട്ടിയുടെ പോളിറ്റ്​ബ്യൂറോ അംഗമായ ചെൻ ക്വാൻഗോക്കെതിരെ യു.എസ്​ വിലക്ക്​. ക്വാൻഗോ ഉൾപ്പടെ ​നാല്​ കമ്യൂണിസ്​റ്റ്​ പാർട്ടി നേതാക്കൾക്കെതിരെയാണ്​ യു.എസ്​ വിലക്കേർപ്പെടുത്തിയത്​. ഉയിഗുർ മുസ്​ലിംകൾക്കെതിരായ മനുഷ്യാവകാശ ലംഘനങ്ങളുടെ പേരിലാണ്​ നടപടി​. യു.എസ്​ അധികൃതർ ഇവരെ കരിമ്പട്ടികയിൽ പെടുത്തും.

ഷിൻജിയാങ്ങിലെ ഡെപ്യൂട്ടി പാർട്ടി സെക്രട്ടറി സാഹു ഹാലുൻ, കമ്യൂണിസ്​റ്റ്​ പാർട്ടി സെക്രട്ടി വാങ്​ മിങ്​ഷാൻ, മുൻ  പാർട്ടി സെക്രട്ടറി ഹുവോ ലിയുജുൻ എന്നിവരേയും വിലക്കിയിട്ടുണ്ട്​​. ഷിൻജിയാങ്​ മേഖലയി​ൽ സ്വന്തം പൗരൻമാരായ ഉയിഗുർ മുസ്​ലിംകൾക്കെതിരെ ചൈനീസ്​ കമ്യൂണിസ്റ്റ്​ പാർട്ടി നടത്തുന്ന ക്രൂരതകൾക്കെതിരെ ലോകം ഒന്നിക്കണമെന്നും​ യു.എസ്​ ആവശ്യപ്പെട്ടു. 

ഉയിഗുർ മുസ്​ലിംകളെ ഏകാന്ത തടവിൽ പാർപ്പിക്കുകയും നിർബന്ധിത ജോലി, മതപരിവർത്തനം, ഭ്രൂണഹത്യ എന്നിവക്ക്​ വിധേയമാക്കുന്നുണ്ടെന്നും യു.എസ്​ ആരോപിച്ചു. ഷിൻജിയാങ്​ മേഖലയിൽ ഉയിഗുർ മുസ്​ലിംകൾക്കെതിരായ ക്രൂരതകളെ കുറിച്ചുള്ള റിപ്പോർട്ടുകൾ നേരത്തേയും പുറത്ത്​ വന്നിരുന്നു. അതേസമയം, ഉപരോധം ഏർപ്പെടുത്താനുള്ള തീരുമാനത്തെ കുറിച്ച്​ യു.എസിലെ ചൈനീസ്​ എംബസി  ഇതുവരെ ഔദ്യോഗികമായി പ്രതികരിച്ചിട്ടില്ല.