അമേരിക്കയില്‍ കോവിഡ്​ മരണം 52,185 കടന്നു; ഒമ്പത്​ ലക്ഷത്തിലേറെ രോഗബാധിതർ

വാഷിങ്​ടണ്‍: കോവിഡ്​ വൈറസ്​ വ്യാപനത്തെ തുടർന്ന്​ അമേരിക്കയില്‍ മരിച്ചവരുടെ 52,185 ആയി. പത്ത് ദിവസത്തിനുള്ളില് ‍ മരണം ഇരട്ടിയായതായി റോയിട്ടേഴ്‌സ് റിപ്പോര്‍ട്ട് ചെയ്യുന്നു. 925,038 ആളുകള്‍ക്ക് കോവിഡ്​ സ്ഥിരീകരിച്ചിട്ടുണ്ട് ​.

ലോകത്തില്‍ ഏറ്റവും കൂടുതല്‍ കോവിഡ് ബാധിതരും മരണവും റിപ്പോർട്ട്​ ചെയ്​തത്​ യു.എസിലാണ്​. രാജ്യത്ത്​ മരണനിരക്ക്​ 32 ശതമാനമായി കുറഞ്ഞു. ഏപ്രിൽ 15ന്​ മരണനിരക്ക്​ 40.18 ശതമാനമായിരുന്നു. കോവിഡ്​ ബാധിച്ച 110,432 പേർ രോഗമുക്തി നേടി. രോഗമുക്തി നിരക്കിൽ വർധനവുണ്ടായിട്ടുണ്ടെന്നാണ്​ റിപ്പോർട്ട്​. ഏപ്രിൽ 15 ന്​ 59.82 ശതമാനമായിരുന്ന രോഗമുക്തി നിരക്ക്​ പത്തുദിവസത്തിനിടെ 68 ശതമാനമായി ഉയർന്നു.

പ്രധാന നഗരമായ ന്യൂയോർക്കിൽ മരണസംഖ്യ 21,291 ആയി ഉയർന്നു. 277,445 കോവിഡ്​ ബാധിതരാണ്​ ഇവിടെയുള്ളത്​. ന്യൂജേഴ്​സിയിൽ 5,617 പേർ മരിക്കുകയും 102,196 പേർക്ക്​ വൈറസ്​ ബാധ സ്ഥിരീകരിക്കുകയും ചെയ്​തിട്ടുണ്ട്​.

അതേസമയം കോവിഡ് ബാധിച്ച് ലോകത്ത് മരിക്കുന്നവരുടെ എണ്ണം രണ്ട് ലക്ഷത്തിലേക്ക് അടുക്കുകയാണ്. വിവിധ രാജ്യങ്ങളിലായി 197,245 പേരാണ് വൈറസ്​ ബാധയെ തുടർന്ന്​ മരിച്ചത്​. 2,830,051 പേര്‍ക്ക് ഇതുവരെ രോഗബാധ സ്ഥിരീകരിച്ചിട്ടുണ്ട്.

ഇറ്റലിയില്‍ 25,969 പേര്‍ മരിച്ചു. സ്പെയിനില്‍ 22,524 പേരും ഫ്രാന്‍സില്‍ 22,245 പേരും മരിച്ചു.ബ്രിട്ടനില്‍ ഇതുവരെ 19,506 പേരാണ് മരിച്ചത്.