സഹായിക്ക്​ കോവിഡ്​: താൻ ദിവസേന പരിശോധന നടത്തുമെന്ന്​​ ട്രംപ്​ 

വാഷിങ്​ടൺ: സഹായിക്ക് കോവിഡ് സ്ഥിരീകരിച്ചതിനു പിന്നാലെ എല്ലാദിവസും താന്‍ കോവിഡ് പരിശോധനക്ക്​ വിധേയനാകാറു​ണ്ടെന്ന് യു.എസ് പ്രസിഡൻറ്​ ഡോണൾഡ്​ ട്രംപ്. ട്രംപി​​െൻറ വ്യക്തി സുരക്ഷാ സംഘത്തിലെ ഒരാള്‍ക്കാണ് കഴിഞ്ഞ ദിവസം കോവിഡ് സ്ഥിരീകരിച്ചത്.

​കോവിഡ്​ പോസിറ്റീവായ സുരക്ഷാ ഉദ്യോഗസ്ഥനുമായി തനിക്ക് സമ്പർക്കമിക്കമില്ലെന്ന്​  ട്രംപ് വ്യക്തമാക്കി. കോവിഡ് സ്ഥിരീകരിച്ചയാളുമായി താൻ നേരിട്ട്​ ഇടപഴകിയിട്ടില്ല. അദ്ദേഹം നല്ലൊരു വ്യക്തിയാണ്​. എന്നാല്‍ തനിക്കും വൈസ് പ്രസിഡൻറ്​ മൈക്ക്​ പെൻസും ഇയാളുമായി അടുത്ത സമ്പർക്കമില്ല. എന്നിരുന്നാലും മൈക്ക്​ പെൻസും താനും കോവിഡ് പരിശോധനക്ക്​ വിധേയരായയെന്നും ട്രംപ്​ വൈറ്റ്​ ഹൗസിൽ മാധ്യമപ്രവർത്തകരോട്​ പറഞ്ഞു. 

വൈറസ് ബാധക്കുള്ള സാധ്യതയുള്ളതിനാല്‍ താനും മൈക്ക് പെന്‍സും വൈറ്റ് ഹൗസ് ജീവനക്കാരും നിശ്ചിത ദിവസം വരെ ഇനി എല്ലാ ദിവസവും കോവിഡ് പരിശോധന നടത്തും. ഇതുവരെ നടത്തിയ പരിശോധനയിലെല്ലാഒ ഫലം നെഗറ്റീവാണെന്നും ട്രംപ് വ്യക്തമാക്കി. നേരത്തെ ആഴ്ചയില്‍ ഒരിക്കലാണ്​ കോവിഡ്​ ടെസ്​റ്റ്​ നടത്തിയിരുന്നത്​. ദിവസേന പരിശോധന നടത്തിയാലും രോഗം ബാധിക്കാതിരിക്കുമെന്ന്​ പറയാനാകില്ലെന്നും ​ട്രംപ്​ കൂട്ടിച്ചേർത്തു.  

അമേരിക്കയിൽ  രോഗബാധിതരുടെ  എണ്ണം 1,292,623 ആയി. മരണസംഖ്യ 76,928 ആയി ഉയര്‍ന്നിട്ടുണ്ട്. 217,250 പേരാണ് അമേരിക്കയില്‍ ഇതുവരെ രോഗമുക്തരായത്.