ഒറോവില്‍ അണക്കെട്ട്: ഒഴിപ്പിക്കല്‍ നിര്‍ത്തി

കാലിഫോണിയ: വടക്കന്‍ കാലിഫോണിയയിലെ ഒറോവില്‍ അണക്കെട്ട് നിറഞ്ഞു കവിഞ്ഞതിനെ തുടര്‍ന്ന് ഒഴിഞ്ഞുപോയവര്‍ക്ക് വീടുകളിലേക്ക് തിരികെവരാന്‍ അധികൃതര്‍ അനുമതി നല്‍കി. അണക്കെട്ടിലെ ജലനിരപ്പ് താഴ്ന്ന് അപകടസാധ്യത കുറഞ്ഞതിനെ തുടര്‍ന്നാണ് നടപടി. എന്നാല്‍, ഏതു സമയത്തും വീണ്ടും ഒഴിഞ്ഞുപോകാന്‍ സന്നദ്ധരായിരിക്കണമെന്ന് പ്രദേശത്തുകാര്‍ക്ക് നിര്‍ദേശം നല്‍കിയിട്ടുണ്ട്.

വെള്ളം നിറഞ്ഞ് അണക്കെട്ടിന്‍െറ പ്രധാന സ്പില്‍വേ തകരാനുള്ള സാധ്യത മുന്നില്‍കണ്ട് കഴിഞ്ഞ ഞായറാഴ്ചയാണ് രണ്ട് ലക്ഷത്തോളം പേരോട് ഒഴിഞ്ഞുപോകാന്‍ ആവശ്യപ്പെട്ടത്. എന്നാല്‍, മഴ കുറഞ്ഞതോടെ അപകടനിലയില്‍ മാറ്റം വരുകയായിരുന്നു. അമേരിക്കയിലെ ഏറ്റവും ഉയര്‍ന്ന അണക്കെട്ടാണ് ഒറോവില്‍ തടാകത്തില്‍ സ്ഥിതിചെയ്യുന്നത്.