ആഘോഷമില്ലാതെ ഇൗദിനെ വരവേൽക്കാനൊരുങ്ങി യു.എസ്​ മുസ്​ലിംകൾ

ന്യൂയോർക്​: ലോകമെങ്ങുമുള്ള മുസ്​ലിംകളുടെ പെരുന്നാളാഘോഷം ഇക്കുറി വീട്ടകങ്ങളിലൊതുങ്ങും. കോവിഡ്​-19 താണ്ഡവമാടിയ അമേരിക്കയിലും സ്​ഥിതി വ്യത്യസ്​തമല്ല. കോവിഡ്​ കാലത്തെ ഈദിനെ വരവേൽക്കാൻ യു.എസിലെ മുസ്​ലിംകൾ തയാറെടുത്തു കഴിഞ്ഞു. 

മിഷിഗണിൽ ഇക്കുറി വ്യത്യസ്​തമായ ഈദ്​ ആയിരിക്കുമെന്ന്​ മിഷിഗൺ കമ്മ്യൂണിറ്റി കൗൺസിൽ ചെയർമാനും ഫിസിഷ്യനുമായ മഹ്​മൂദ്​ അൽ ഹദീദി പറയുന്നു. പള്ളികളിൽ നമസ്​കാരമില്ല, ആളുകളൊന്നിച്ചിരുന്ന്​ ഭക്ഷണം കഴിക്കില്ല, വൈകുന്നേരങ്ങളിലുണ്ടാകാറുള്ള കുടുംബ സംഗമങ്ങളുണ്ടാകില്ല... എല്ലാത്തവണയും സ്വന്തം വീട്ടിൽ 500 ആളുകൾ വരെ പ​ങ്കെടുക്കുന്ന പരിപാടിയാണുണ്ടാകുക. ഇക്കുറി അത്​ നടക്കില്ല. ഈ സാഹചര്യത്തോട്​ പൊരുത്തപ്പെടാൻ ശ്രമിക്കുകയാണ്​ -അദ്ദേഹം പറഞ്ഞു. 

മെയ്​ 28 വരെയാണ്​ യു.എസിൽ സാമൂഹിക കൂടിച്ചേരലുകൾക്ക്​ നിയന്ത്രണം. 
സാധാരണ ഈദിന്​ രാവിലെ പള്ളിയിൽ പോകും. അത്​ കഴിഞ്ഞാന്​ പ്രഭാത ഭക്ഷണം. ഡിന്നർ പുറത്താകും എല്ലാ കുടുംബങ്ങളും. അതായത്​ കൂടുതൽ സമയവും വീട്ടിന്​ പുറത്താകും. ഇക്കുറി എല്ലാം മാറി. ലാമാ സമ്മാൻ പറയുന്നു. 

ജോൺ ഹോപ്​കിൻസ്​ യൂനിവേഴ്​സിറ്റിയുടെ കണക്കുകൾ പ്രകാരം മിഷിഗണിൽ 53,000 പേർക്കാണ്​ കോവിഡ്​ സ്​ഥിരീകരിച്ചത്​. 5000 പേർ മരിക്കുകയും ചെയ്​തു.