കോവിഡ്​ രോഗികൾ കൂടി; ബ്രസീൽ നഗരത്തിലെ ആരോഗ്യ മേഖല തകർച്ചയുടെ വക്കിൽ

റിയോ ഡി ജനീറോ: ബ്രസീലിൽ കോവിഡ്​ 19 കേസുകൾ ഗണ്യമായി ഉയരുന്ന സാഹചര്യത്തിൽ രാജ്യത്തെ ഏറ്റവും വലിയ നഗരങ്ങളിലൊന്നായ സാവോ പോളോയിലെ ആരോഗ്യ മേഖല തകർച്ചയുടെ വക്കിൽ. നഗരത്തി​​​െൻറ മേയറാണ്​ ഇതുമായി ബന്ധപ്പെട്ട്​ പ്രതികരിച്ചത്​.​ സാവോ പോളോയിലെ ആശുപത്രികളെല്ലാം 90 ശതമാനം നിറഞ്ഞതായും രണ്ടാഴ്ചക്കുള്ളിൽ നഗരത്തിലെ എല്ലാ ആശുപത്രികളും നിറഞ്ഞ് കവിയുമെന്നും മേയർ ബ്രൂണോ കോവസ് പറഞ്ഞു​.

രോഗികളെ കിടത്താൻ കിടക്കകളോ ചികിത്സിക്കാനുള്ള മറ്റ്​ സൗകര്യങ്ങളോ ഇല്ലെന്നും വരും ദിവസങ്ങളിൽ അത്​ കൂടുതൽ ബുദ്ധിമുട്ട്​ സൃഷ്​ടിക്കുമെന്നും അദ്ദേഹം അറിയിച്ചു. ലോക്ഡൗൺ നിയന്ത്രണങ്ങളിൽ അലംഭാവം കാട്ടുന്ന സർക്കാർ ജനങ്ങളുടെ ജീവൻ വച്ചാണ് കളിക്കുന്നതെന്നും ബ്രൂണോ ചൂണ്ടിക്കാട്ടി.

നഗരത്തിലെ ജനങ്ങളോട്​ വീട്ടിലിരിക്കാൻ ആവശ്യപ്പെട്ട മേയർ ലോക്​ഡൗൺ ഏർപ്പെടുത്താൻ വേണ്ടി സാവോ പോളോ ഗവർണറുമായി ചർച്ചയിലാണെന്നും അറിയിച്ചു. രണ്ട്​ മാസം മുമ്പ്​ നഗരത്തിൽ നിയന്ത്രണങ്ങൾ ഏർപ്പെടുത്തിയിരുന്നെങ്കിലും ജനങ്ങൾ അതെല്ലാം കാറ്റിൽ പറത്തി പതിവുപോലെ പുറത്തിറങ്ങുകയും മാസ്​ക്​ പോലും ധരിക്കാതിരിക്കുകയും ചെയ്​തിരുന്നതായി ബി.ബി.സി റിപ്പോർട്ട്​ ചെയ്​തു. ബ്രസിലിലെ കൊവിഡ് ഹോട്ട്സ്പോട്ടുകളിൽ ഒന്നായ സാവോ പോളോയിൽ 3,000 ത്തോളം പേർ ഇതേവരെ മരിച്ചു.

കോവിഡ്​ കേസുകളിൽ സ്​പെയിൻ, ഇറ്റലി എന്നീ രാജ്യങ്ങളെ ബ്രസീൽ ശനിയാഴ്​ച മറികടന്നിരുന്നു. കഴിഞ്ഞ 24 മണിക്കൂറിൽ 2,972 കേസുകൾ റിപ്പോർട്ട്​ ചെയ്യപ്പെട്ടതോടെ ആകെ രോഗികളുടെ എണ്ണം 2,44,052 ആയി ഉയർന്നു. 83 പേർക്ക്​​ ഇന്ന്​ രാജ്യത്ത്​ വൈറസ്​ മൂലം ജീവൻ നഷ്​ടപ്പെട്ടതോടെ ആകെ മരണം 16,201 ആയി.