കൊറോണ വുഹാനിലെ ലാബിൽനിന്ന്​ പുറത്തുവിട്ടതെന്നതിന് ​തെളിവുണ്ട്; ചൈനക്കെതിരെ വീണ്ടും ട്രംപ്​

വാഷിങ്ടൺ: അമേരിക്കയിൽ കോവിഡ്​ ബാധിതരുടെ നിയന്ത്രണാതീതമായി വർധിക്കുന്ന സാഹചര്യത്തിലും ചൈനയെ ഭീഷണിപ്പെടുത്തി ​പ്രസിഡൻറ്​ ഡോണൾഡ്​ ട്രംപ്​. കോവിഡ്​ വൈറസ് ചൈനയിലെ വുഹാനിലുള്ള സർക്കാർ വൈറോളജി ലബോറട്ടറിയിൽ നിന്നു പുറത്തുവന്നതാണെന്നതിന് തെളിവുണ്ടെന്നാണ്​ ട്രംപിൻെറ അവകാശവാദം. കോവിഡ്​ ​ മഹാമാരിക്കു പിന്നിൽ ചൈനയാണെന്ന്  ട്രംപ് നിരന്തരം ആരോപിക്കുന്നുണ്ട്. ഈ വാദത്തിന് പിൻബലം നൽകാന്‍ തെളിവുണ്ടോയെന്ന മാധ്യമപ്രവർത്തകരുടെ ചോദ്യത്തിന്​ ‘ത​​​െൻറ പക്കൽ തെളിവുണ്ട്​’ എന്നാണ്​ ട്രംപ്​ പറഞ്ഞത്​. ചൈനക്കെതിരായ ആരോപണങ്ങളിൽ എന്തുകൊണ്ട്​ ഉറച്ചുനിൽക്കുന്നുവെന്ന ചോദ്യത്തിന്​ അതിനെ കുറിച്ച്​ തനിക്ക്​ ഇപ്പോൾ പറയാനാകില്ലെന്ന്​ മറുപടി നൽകി. 

ചൈനയുമായുള്ള യു.എസ് കടബാധ്യത റദ്ദാക്കാൻ കഴിയുമെന്ന റിപ്പോർട്ടുകളെക്കുറിച്ച് ചോദിച്ചപ്പോൾ, വ്യത്യസ്തമായി അത് ചെയ്യാമെന്നും ഒരുപക്ഷേ കുറച്ചുകൂടി നേരായ രീതിയിൽ പ്രവർത്തിക്കാനാകുമെന്നും​  ട്രംപ് പറഞ്ഞു. കടം വാങ്ങൽ കരാർ റദ്ദാക്കുന്നതിന്​ സമാനമായത് ചെയ്യാൻ കഴിയുമെന്നും ട്രംപ്​ ആവർത്തിച്ചു. കോവിഡ്​ വൈറസിനെ ചൈനക്കെതിരെയുള്ള രാഷ്ട്രീയ ആയുധമായി ഉപയോഗിക്കാനാണ് യു. എസ്‍ പ്രഡിൻറ്​ ശ്രമിക്കുന്നത്. വുഹാനിലെ ലാബിൽ നിന്നാണ്​ വൈറസ്​ പുറത്തുവിട്ടതെന്ന്​ കണ്ടെത്താൻ യു.എസ്​ സി.ഐ.എ ഉൾപ്പെടെയുള്ള രഹസ്യാന്വേഷണ സംഘടനക​ളുടെ മേൽ സമ്മർദ്ദം ചെലുത്തി വരികയാണ്​. 

ലോകമെങ്ങും 33 ലക്ഷത്തിലധികം പേരെ വൈറസ് ബാധിച്ചിട്ടുണ്ട്. മുന്നറിയിപ്പുകൾ ലഭിച്ചിട്ടും അമേരിക്കയിലാണ്​ ഏറ്റവും കൂടുതൽ  രോഗബാധിതരുംകോവിഡ്​ മരണങ്ങളുമുണ്ടായത്​. ആറ് ആഴ്ചക്ക​ുള്ളിൽ അമേരിക്കയിൽ മൂന്നുകോടി തൊഴിലവസരങ്ങൾ നഷ്​ടപ്പെട്ടതായുള്ള ഡാറ്റയും പുറത്തുവന്നിരുന്നു. കോവിഡ്​ വ്യാപനം നിയന്ത്രിക്കുന്നതിൽ ഭരണകൂടം പരാജയപ്പെട്ടെന്ന വിമർശനത്തെ പ്രതിരോധിക്കാൻ ചൈനയുടെമേൽ പഴിചാരുകയാണ് അമേരിക്ക. ചൈനക്ക്​ എതിരായ തെളിവു കണ്ടെത്തണമെന്ന്  മുൻ സി.ഐ.എ ഡയറക്ടറും സ്റ്റേറ്റ് സെക്രട്ടറിയുമായ മൈക്​ പോംപിയോയും ആവശ്യ​െപ്പട്ടിരുന്നതായി റി​േപ്പാർട്ട്​ പുറത്തുവന്നിരുന്നു.

അതേസമയം, അങ്ങനെയൊരു തെളിവു കണ്ടെത്താനാകുമോയെന്ന കാര്യത്തിൽ ഉറപ്പിലാതെ നിൽക്കുകയാണ്​ രഹസ്യാന്വേഷണ ഏജൻസികൾ. മൃഗങ്ങളിൽനിന്ന് മനുഷ്യരിലേക്കു പടർന്ന എച്ച്.ഐ.വി, ഇബോള, സാർസ് ‌രോഗങ്ങളുടേതിന് സമാനമാണ് കൊറോണയുടെ ജനിതകഘടന, ലബോറട്ടറികളിൽ നിന്ന് വികസിപ്പിച്ചെടുത്തതല്ല ഇതെന്നാണ്​ ശാസ്​ത്രസംഘം മനസ്സിലാക്കിയത്‌.