കോവിഡ്​ 19: വിസകൾ താൽകാലികമായി റദ്ദാക്കിയതായി യു.എസിലെ ഇന്ത്യൻ എംബസി

വാഷിങ്​ടൺ: ഇന്ത്യയിലേക്കുള്ള വിസ ഏപ്രിൽ 15 വരെ താൽകാലികമായി റദ്ദാക്കിയതായി യു.എസിലെ ഇന്ത്യൻ എംബസി. മാർച്ച്​ 13 മ ുതൽ വിസ റദ്ദാക്കൽ പ്രാബല്യത്തിൽ വരും. കൊറോണ വൈറസ്​ പടർന്നു പിടിക്കുന്ന സാഹചര്യത്തിൽ നയതന്ത്ര, ഔദ്യോഗിക യാത്രകൾ ഒഴികെ ഇന്ത്യയിലേക്കുള്ള മുഴുവൻ വിസകളും ഇന്ത്യൻ സർക്കാർ താൽകാലികമായി റദ്ദാക്കുകയായിരുന്നു.

ഓവർസീസ്​ സിറ്റിസൺഷിപ്​ ഓഫ്​ ഇന്ത്യ(ഒ.സി.ഐ) കാർഡ്​ കൈവശമുള്ള വിസ രഹിത യാത്രക്ക്​ അനുമതി ലഭിച്ച യു.എസിലുള്ള ഇന്ത്യൻ പൗരൻമാർ ഏപ്രിൽ 15വരെ യാത്ര നിർത്തിവെക്കണമെന്ന്​ എംബസി പ​ുറത്തു വിട്ട പ്രസ്​താവനയിൽ പറയുന്നു. ലോകാരോഗ്യ സംഘടന കോവിഡ്​ 19നെ മഹാമാരിയായി പ്രഖ്യാപിച്ചതിനു പിന്നാലെയാണ്​ നടപടി.

ചൈനയിലെ വുഹാനിൽ പൊട്ടിപ്പുറപ്പെട്ട കൊറോണ വൈറസ്​ ബാധ 90 രാജ്യങ്ങളിലായി 1,10,000 ആളുകളെയാണ്​ ബാധിച്ചത്​. ബുധനാഴ്​ച വരെ രാജ്യത്ത്​ 50 പേർക്കാണ്​ കോവിഡ്​ 19 സ്ഥിരീകരിച്ചത്​. ഫെബ്രുവരി 15ന്​ ശേഷം ചൈന, ഇറ്റലി, ഇറാൻ, റിപ്പബ്ലിക്​ ഓഫ്​ കൊറിയ, ഫ്രാൻസ്​, സ്​പെയിൻ, ജർമനി എന്നീ രാജ്യങ്ങളിൽ നിന്ന്​ വരുന്ന, അല്ലെങ്കിൽ സന്ദർശനം നടത്തിയ ഇന്ത്യൻ പൗരൻമാർ ഉൾപ്പെടെയുള്ളവർ 14 ദിവസമെങ്കിലും പുറംലോകവുമായുള്ള സമ്പർക്കം ഒഴിവാക്കണമെന്ന്​​ സർക്കാർ അറിയിച്ചിട്ടുണ്ട്.