You are here

ലോക്​ഡൗണിൽ ഭക്ഷണമില്ല; ചിലിയിൽ ജനങ്ങൾ തെരുവിലിറങ്ങി

23:00 PM
19/05/2020
REUTERS/Ivan Alvarado

സാൻറിയാഗോ: കോവിഡ്​ മഹാമാരിയെ തുടർന്ന്​ പ്രഖ്യാപിച്ച ലോക്​ഡൗണിൽ ഭക്ഷണം ലഭിക്കുന്നില്ലെന്ന്​ ആരോപിച്ച്​ ലാറ്റിനമേരിക്കൻ രാജ്യമായ ചിലിയുടെ തലസ്ഥാന നഗരിയിൽ ജനങ്ങൾ തെരുവിലിറങ്ങി. നഗരത്തിലെ ദരിദ്ര വിഭാഗം വസിക്കുന്ന മേഖലയായ എൽ ബോസ്കിലും സമീപ പ്രദേശങ്ങളിലുമാണ്​ നൂറുകണക്കിന്​ ആളുകൾ തെരുവിലിറങ്ങിയത്​. തുടർന്ന്​ സംഘർഷാവസ്ഥയിലേക്ക്​ നീങ്ങുകയും പൊലീസും പ്രതിഷേധക്കാരും ഏറ്റുമുട്ടുകയും ചെയ്​തു. പ്രതിഷേധകരെ ഒഴിപ്പിക്കാൻ പൊലീസ് കണ്ണീർ വാതകം പ്രയോഗിച്ചു. 

തെരുവിൽ തടിച്ചുകൂടിയ പ്രതിഷേധക്കാർ കല്ലെറിയുകയും വിറകുകൾ കൂട്ടിയിട്ട്​​ കത്തിക്കുകയും മുദ്രാവാക്യങ്ങൾ മുഴക്കുകയും ചെയ്​തു. ഏപ്രിൽ പകുതി മുതൽ നഗരം അടച്ചുപൂട്ടിയ നിലയിലായിരുന്നു. തുടർന്ന്​ എൽ ബോസ്​കിൽ വസിക്കുന്ന കുടുംബങ്ങൾ തീർത്തും പട്ടിണിയായതായി മുൻസിപ്പാലിറ്റി പ്രസ്​താവനയിലൂടെ അറിയിച്ചു. കർശന നിയന്ത്രണങ്ങൾ തുടരുന്നതിനാൽ ഭൂരിഭാഗം ആളുകൾക്കും ജോലിയും നഷ്​ടമായി. സംഭവത്തിന്​ പിന്നാലെ രാജ്യത്ത് എല്ലാവർക്കും ആഹാരം ഉറപ്പാക്കുമെന്ന് പ്രസിഡൻറ്​ സെബാസ്റ്റ്യൻ പിന്യേറ വ്യക്​തമാക്കി. അടുത്ത ആഴ്ചയോടെ 2.5 ദശലക്ഷം ഭക്ഷ്യ, അവശ്യസാധന കിറ്റുകൾ വിതരണം ചെയ്യുമെന്നും പ്രസിഡൻറ്​ ഉറപ്പുനൽകി.

ലാറ്റിനമേരിക്കൻ രാജ്യമായ ചിലിയിൽ ഇതുവരെ 46,059 പേർക്ക്​ കൊവിഡ് 19 സ്ഥിരീകരിക്കുകയും 478 പേർ മരിക്കുകയും ചെയ്​തു. രാജ്യത്തെ പല നഗരങ്ങളും രോഗ ഭീതിയെ തുടർന്ന്​ കർശന ലോക്​ഡൗണാണ്​ ഏർപ്പെടുത്തിയിരിക്കുന്നത്​. എന്നാൽ പലയിടങ്ങളിലും ഭക്ഷ്യക്ഷാമം റിപ്പോർട്ട്​ ചെയ്​തതോടെ പ്രതിസന്ധിയിലാണ്​ രാജ്യം. ചിലി സെനറ്റിലെ ഡസൻ കണക്കിന് അംഗങ്ങളും രണ്ട് മന്ത്രിമാരും കൊവിഡ് രോഗികളുമായി സമ്പർക്കത്തിലേർപ്പെട്ടതിനെ തുടർന്ന് ഐസൊലേഷനിൽ തുടരുകയാണ്​.

Loading...
COMMENTS