കുഞ്ഞുപെങ്ങളെ നായയിൽനിന്ന്​ രക്ഷിച്ചു;  ആറ്​ വയസുകാര​െൻറ ശരീരത്ത്​ 90 തുന്നലുകൾ

വയോമിങ്​: കുഞ്ഞുപെങ്ങളെ നായയിൽ നിന്ന്​ രക്ഷിക്കുന്നതിനിടെ ഗുരുതര പരിക്കേറ്റ ബ്രിഡ്​ജർ വാക്കർ എന്ന ആറുവയസ്സുകാര​​െൻറ ധീരത​െയ പ്രശംസിക്കുകയാണ്​ സൈബർ ലോകം. അമേരിക്കൻ ഐക്യനാടുകളിലെ ഒരു സംസ്​ഥാനമായ വയോമിങി​​െൻറ തലസ്​ഥാനമായ ഷയേനിലാണ്​ നാല്​ വയസ്സുള്ള പെങ്ങളെ നായയിൽ നിന്ന്​ രക്ഷിക്കുന്നതിനിടെ ബ്രിഡ്​ജറിന്​ ഗുരുതര പരിക്കേൽക്കുന്നത്​. മുഖത്തും തലയിലുമായി 90 തുന്നലുകൾ വേണ്ടി വന്നു.

ഈമാസം ഒമ്പതിനാണ്​ അത്യന്തം സങ്കടകരമായ സംഭവം നടന്നത്​. കുഞ്ഞുപെങ്ങളെ കടിക്കാന്‍ തുനിഞ്ഞ ഒരു വയസുള്ള ജര്‍മന്‍ ഷെപേര്‍ഡ് ഇനത്തിലെ നായയെ പ്രതിരോധിക്കുന്നതിനിടെയാണ് ബ്രിഡ്ജറിന് ഗുരുതരമായി പരിക്കേല്‍ക്കുന്നത്. ബ്രിഡ്ജറുടെ കവിളിലാണ് നായ കൂടുതലും കടിച്ചത്. 90 തുന്നലുകളോടെയാണ്​ രണ്ട് മണിക്കൂര്‍ നീണ്ട ശസ്ത്രക്രിയ പൂര്‍ത്തിയായത്​. എന്തിനാണ് നായയെ പ്രതിരോധിച്ചത് എന്ന ചോദ്യത്തിന് ‘ആരെങ്കിലും ഒരാള്‍ മരിക്കണം. അത് ഞാനായിക്കോ​ട്ടെ എന്ന് തീരുമാനിച്ചു’ എന്നാണ് ബ്രിഡ്ജര്‍ മറുപടി നല്‍കിയത്.

ബന്ധുവായ നിക്കോൾ നോയൽ വാക്കർ ഇൻസ്​റ്റഗ്രാമിൽ ചിത്രങ്ങളടക്കം പോസ്​റ്റ്​ ചെയ്​തതേ​ാടെയാണ്​ ബ്രിഡ്​ജറി​​െൻറ ധീരത പുറംലോകമറിയുന്നത്​. പിന്നെ ബാലനെ പ്രശംസിച്ച്​ സിനിമതാരങ്ങൾ വരെ രംഗത്തെത്തി. സമൂഹ മാധ്യമങ്ങൾ ബ്രിഡ്​ജറി​​െൻറ ധീരത ഏറ്റെടുത്തു. 

‘ഇവനിൽ ഞാനൊരു സൂപർ ഹീറോയെ കാണുന്നു’ എന്നായിരുന്നു അമേരിക്കൻ നടിയായ ആൻ ഹാത്തവേയുടെ പ്രതികരണം. ‘ബ്രിഡ്ജര്‍, നി​​െൻറ ഈ പ്രായത്തില്‍ എനിക്ക് നി​​െൻറ പകുതി പോലും ധീരതയില്ലായിരുന്നു. നിനക്ക് പെട്ടെന്ന് സുഖപ്പെടട്ടെയെന്ന് ആശംസിക്കുന്നു’ എന്ന കുറിപ്പും ബ്രിഡ്​ജറി​​െൻറയും സഹോദരിയുടെ ചിത്രത്തിനൊപ്പം ആന്‍ ഹാത്തവേ ഇൻസ്​റ്റഗ്രാമിൽ പങ്കുവെച്ചു. ഈ പോസ്​റ്റിന് പത്ത്​ ലക്ഷത്തിലധികം ലൈക്കുകളും കമൻറുകളുമാണ് ഇൻസ്​റ്റഗ്രാമില്‍ ലഭിച്ചിട്ടുള്ളത്.

‘കാപ്​റ്റൻ അമേരിക്ക’ ഫെയിം ക്രിസ്​ ഇവാൻസും ബ്രിഡ്​ജറിനെ പ്രശംസിച്ച്​ രംഗത്തെത്തി. ‘നീ എ​​െൻറ ഹീറോയാണ്​. നീ ചെയ്​തത്​ ധീരവും നിസ്വാർഥവുമായ കാര്യമാണ്​. നിന്നെ പോലൊരു മൂത്ത സഹോദരനെ കിട്ടിയ ആ പെങ്ങൾ ഭാഗ്യവതിയാണ്​’- ക്രിസ്​ അഭിപ്രായപ്പെട്ടു.